Jalov

Jalov (turk.: Yalova) om lidn Turkanman lodehes. Se om kurort hulil mineraližil purtkil, Jalovan agjan administrativine keskuz (vspäi 1995).

Jalov
Yalova

Valdkund	Turkanma
Eläjiden lugu (2020)	128,933 ristitud
Pind	166,85 km²
Telefonkod	+90-(0)226
Aigvö	UTC+3

Istorii

Amuižen aigan eländpunktan nimituz oli Pilai (grek.: Πύλαι). Vl 1302 osmanižed turkad otiba eländpunktad vägel, i pigai se kändihe Ottomanan imperijan palaks. Lidnan nimi libub turkan kelen sanoišpäi: yalı «kodi randal» i ova znamoičeb «tazangišt».

Mustafa Kemal' Atatürk eli lidnas ičeze jäl'gmäižil vozil statjoidme. Vll 1930−1995 lidn mülüi Stambulan agjaha. Vn 1999 manrehkaiduz (7,4 magnitudanke) mureni lidnad lujas, pölištui enamba 2,5 tuh. lidnalaižid.

Jalov šingotase laivansauvomižel (tankerad, sured traulerad da toižed specialižed laivad, laivmašiništon vajehtuz i kohenduz), lebutahoks.

Geografijan andmused

Lidn sijadase Mramorižen meren päivnouzmaižel randal, 30 m ü.m.t. keskmäižel korktusel. Lähembaižed sured lidnad oma Izmit i Stambul. Jäl'gmäine om pohjoižhe lidnaspäi meren taga, matkad ehtatimel om 47 km, avtotedme 93 kilometrad.

Klimat om Keskmeren. Voden keskmäine lämuz om +15,1 C°, kezakun-sügüz'kun +21..+24 C°, tal'vkun-keväz'kun +7..+9 C°. Ekstremumad oma −11 C° i +42 C°. Paneb sadegid 748 mm vodes, vähemba heinkus-elokus (22..34 mm kus), enamba tal'vkus (105 mm).

Eläjad

Vl 2012 lidnan eläjiden lugu oli 102 874 ristitud. Kaikiš suremb ristitišt oli 129 013 eläjad vl 2019. Agjan viž kudendest elädas lidnas.

Irdkosketused

• Lidnan oficialine sait (yalova.bel.tr). (turk.)