Xugo da toła
From Wikipedia, the free encyclopedia
Un xugo da toła el xe un xugo che richiede na ben definia superfise de xugo, che ła vien dita de sołito tabełon o plansa ladove nò i existe termini pì specifisi ligai al spesifego xugo in question (par exenpio scachiera o damiera); so ła superfise i vien solitamente piasi e/o spostai i tochi che, senpre in asensa de termini pì spesifici, i vien ciamai segnałini. Oviamente nò ła xe na categoria de cui se posa dar na definision tanto precixa; par exenpio, el conseto de tabełon pol essar anca intexo in senso pitosto lato (includerà el caxo de planse individuałi pà i xugadori, tabełon asenblai via via come parte del xugo, evc.). In sostansa, se podarìa includare in questa categoria quałunque xugo richieda na toła o superfise anałoga, ma escludendo i xughi de carte tradisionałi, che i xe un mondo a sé stante; opùr se pol rifarse all'espresion (tuto somato nò cussi vaga) "xughi in scatoła".
I xughi da toła i raprexenta un fenomeno pitosto difondesto infra i paexi osidentałi come momento de agregasion, anca se ła łoro inportansa inte ła vita sociałe dipenda anca da łe tradision nasionałi. In Xermania e inte i paexi de łéngua todésca, par exenpio, ła cultura del xugo da toła xe tanto pì difondesta che in Itałia. Nò a caxo propio ła Xermania ospita el premio Spiel des Jahres (xugo dell'ano), che xe el pì inportante del mondo.
Sto xenare de xughi gà na notevołe inportansa come intratenimento pà ła famèja, spesalmente par quełi che i se presta a essar xugai a tute łe età; ma nò i manca xughi da toła łe cui regołe łe pol rixultar masa conplicae parsin par tanti adulti (come alcuni wargame), o che i richiede un raxonamento atento e aprofondìo (come tanti clasici xughi astrati cuałi i scachi e ła dama).