From Wikipedia, the free encyclopedia
La Storia de l'Egito la ne dixe che za 5000 ani prima de Cristo na cultura distinta da le altre del Medio Oriente la se stava formando longo el fiume Nilo. El periodo de i faraoni l'è scominsià pi tardi, inte el 3100 a.C., co l'unificasion de l'Egito in on solo Stato. No Stato che el xe andà vanti fin al 332 a.C. co el xe stà conquistà da Alesandro el Grande. Da alora, l'Egito xe stà governà da i Tolomei fin a la conquista romana.
L'Egito xera abità fin da i tempi preistorici. Le piture rupestri xe na testimoniansa direta de le popolasion che vivea su tuto el teritorio. No se ga da desmentegar che in tempi antichi tuto l'Egito xera fertile, co pascoli adati a l'alevamento del bestiame. Co la desertificasion che portarà a la formasion del deserto del Sahara (8000 a.C. in poi) la popolasion la sa riunia longo el fiume Nilo, l'unico posto dove se podea coltivar e alevar animai. I ricatamenti archeologici ne fa saver che intorno al 6000 a.C. ghera za na cultutra sedentaria e organizà longo el Nilo, co la costrusion de case e palazi permanenti. Scominsia così el periodo pre-dinastico che culminarà co la formasion de do regni: quelo del Nord (comprendente el delta del Nilo e la rejon subito a sud) e quelo del Sud (tuto l'Egito centrale e meridionale).
En sto periodo se nota l'uso del rame (che no l'è presente in Egito e dovea vegnar dal Sinai o da la Nubia) e el miglioramento de la tecnologia ne la preparasion de vasi de teracota (culture Badariana e Tasiana, dal nome de i siti do sà catà i ogeti, Badari e Der Tasa). Dopo ste culture, se pasa al periodo Amratiano, dal sito de el-Amra. En sto periodo se vede che el marcà co paexi confinanti xera in aumento, così come anca el marcà tra nord e sud del paexe. L'ultimo stadio prima del periodo de i Faraoni xe la cultura Gerzana, dal sito de Gerza. En sto periodo se nota come la tecnologia ga parmeso la costrusion de varie cità de pi de 5000 abitanti. Scominsia l'uso de matoni coti. La majoria de la popolasion xera sedentaria. El rame xera usà sempre pi ne la preparasion de ogeti, strumenti e armi. I ogeti de la casa mostra sempre pi de frecuente disegni e intagli.
I primi documenti scriti risale al 3150 a.C. Secondo ste tradisioni, el primo re de l'Egito xe stà Menes, che ghavaria uniò i do regni. Recenti ricatamenti dixe che el re che ga uniò i do regni xera Narmer. No xe posìbiłe esar pi precisi al riguardo. Se pol dir solo che dopo l'uniicasion de i do regni, scominsia le dinastie de i Faraoni. La cultura, le tradisioni, l'architetura, le arti, la religion e le struture sociali de l'Egito xe restae stàbiłi par tremila ani.
El primo periodo dinastico xe conosù come el Regno Vecio. El Regno Vecio va dal 3150 al 2134 a.C., da la prima a la sesta dinastia. La cavedal del Regno Vecio xera Menfi. En sto periodo xe stà costruie le piramidi. El faraon pi imporante xe stà Djoser (2630-2611) che ga costruio la piramide de Saqqara.
El punto pi alto del Regno Vecio l'è stà co el Faraone Sneferu, fondator de la quarta dinastia. Sneferu ga fato costruir tre piramidi, so fiol Khufu ga fato costruir la piramide granda de Giza, l'altro fiol Khafra (Cheope) e el neodo Menkaura ga anca lori costruì grose piramidi. La costrusion de le piramidi xe la testimoniansa del poder econòmego de i faraoni, ma anca de la capacità organizativa e tecnologica. No bisogna pensar che le piramidi xe stà costrui da sciavi, n'idea che la vien da la letura de la Bibia. I costrutori de le piramidi xera in majoria agricoltori libari, guidà da on grupo de tecnici che dirixea i laori, lavoradori specialixà de la piera. Matemateghi e sacerdoti.
El Regno Vecio xe terminà co el faraon Usherkhaf (2465-2458) ga fato na reforma del governo. La reforma ga diminuiò el poder central a favore de i nomes (le rejoni) che ga scominsià na guera civil par verghe pi poder. I problemi sociali xe continuà anca soto i faraoni che xe vegnù dopo Usherkaf. Co le carestie dovue a la mancanza de piova de i ani 2200 - 2150, se riva a la fin del Regno Vecio e al primo periodo intermedio.
El periodo intermedio xe durà dosento ani, da la sesta a la undicesima dinastia. I faraoni de stò tempo xera picoli re che no gavea el control de tutto el paexe. En stò periodo ghe l'invasion de 'i arcieri', on popolo che vegnea da l'Axia e el sachegio de le piramidi e de le tombe pi antiche. La nona e decima dinastia controlava parti del Baso Egito con cavedal a Eraclopoli, la undicesima dinastia la governava l'Alto Egito da Tebe. Dopo na longa guera, el faraone Mentuhotep II de Tebe ga vinto e ga riunì le Do Tere, dando vita al Regno de Mezo.
El Regno de Mezo va dal 2030 al 1640 a.C., e comprende le dinastie undicesima, dodicesima e parte de la tredicesima. La cavedal xera a Tebe (11 Dinastia) e el-Lisht (12 dinastia). Dopo la riunificasion de la naxion, Mentuhotep II ga moso guera contro la Nubia, che la sera stacà da l'Egito durante el periodo intermedio, e contro i Stati de Canaan (Palestina). El faraone ga risistemà l'aministrasion publica e istituì la carica de primo ministro (vizir). CO la dodicesima dinastia, la Nubia e la Libia xe stà conquistà e sotomese soto i faraoni Amenemhat I e Senusret I e II. Amenehemat III (1860-1839) xe stà l'ultimo grande faraone de sta dinastia. Durante el so regno, la popolasion xera cresuda tanto che la produsion alimentare no la bastaa a covrir la domanda interna, e na serie de ani de carestia ga portà a la fin del Regno de Mezo e l'inisio del secondo periodo intermedio.
En tel secondo periodo intermedio, i faraoni no gavea forsa. Da na parte lo Stato xera disorganizà, da l'altra, le carestie gavea indebolio la naxion. On popolo axiàtego conosù come i hyksos xe stà boni de caturar la cità de Avaris e de formar on regno in tel delta del Nilo. I faraoni egisiani ga mantegnù el control de l'Altro Egito, ma no xera boni de contrastar el poder de i hyksos. No sembra, parò, che ghe sia stà de le guere tra i do regni. El periodo intermedio xe rivà a fin co la diciasetesima dinastia. I faraoni de sta dinastià xe stà boni de organixar el paexe e de contrastar la potensa de i hyksos soto la guida de Tao II e Kamose. Ahmose I xe stà el primo faraon bon de parar via i hyksos da l'Egito, portar la cavedal a Tebe, riconquistar la Nubia e tuta la costa mediteranes fin in Fenicia. Ahmose I l'è stà l'ultimo faraon de la diciasetesima dinastia e el primo de la diciotesima.
Sto periodo xe stà quelo pi rico del paexe. I pi importanti faraoni, i i pi conosù, xe de sto periodo. Se cata una de le poche faraone, Hatshepsut. Ela la xe sta bona de conquistar nove tere e de estendar el control su le trate da la Somalia a tuto el Mediteraneo. El so sucesor, Thutmose III, ga esteso el control in Axia. Amenhotep III ga costruoio i pi importanti monumenti de Karnak, el tempio de Luxor e novi templi a Ma’at. El sucesor, Amenhothep IV, ga insistio sul monoteismo, el ga anca cambià el so nome in Akhanaten, in onor del dio Aten. En sto modo, el sa scontrà co la clase sacerdotale che gavea sempre dà el primo posto a Amon-Ra. El faraon ga prima dito che Aten l’era el pi importante dio, dopo el ga dito che el xera l’unico e che Aten, Amon-Ra e Horus xera la stesa cosa. Amenhothep IV ga anca sostegnù le arti e novi modei de arte pitorica. A la so morte, Smenkhkare – el co regente – xe diventà faraone. No se sà se Smenkhkare xera on omo o na dona, se xera la mojer de Amenhothep IV co on novo nome faraonico, o n’altra persona. La religon politeista l’è tornà subito a gala. A la morte de Smenkhkare, dopo pochi mexi, xe saliò al trono Tutankhamon.
Tutankhamon xera un buteleto e el regno l’era mandà avanti dal general Horemheb. Tutankhamon xe morto oncora zoino, dopo esar cascà da caval durante na batuta de cacia inte el deserto. Dopo de lu el regno pasò a Ay e dopo on par de ani al general Horemheb. El vecio generale ga fato de i cambiamenti importnti in tel modo de governare e ga ridato splendor al paexe. A la so morte, el general Paramessu l’à tolto el poder co el nome de Ramesses, e ga scominsià la dicianovesima dinastia. So fiol Seti I xe el faraon che ga fato costruir el complexo religoiso de Abydos. Dopo de Seti, xe stà el tempo de Ramesses II. Co i so 67 ani de regno, Ramesses II xe stà bon de continare le riforme de so nono e de so pare e de costrir novi templi, come quelo de Abu Simbel. Le so campagne militari xe culminà co la bataglia de Kadesh, ricord anca ne la Bibia, dove el xe riusio a vinsar contro i ititi. L’ultimo grande faraone del Regno Novo xe stà Ramesses III. El ga fermà le invasion del ‘popolo del mare’, che ga poi invaso Canaan, e le scoribande de i libici. Dopo de lu, i faraoni no i ga vù vero poder, e i no xe stà gnanca boni de reagir a le carestie e la mancansa de piova. Al tempo de Ramesses XI, i preti de Amun controlava el sud del paexe, mentre el nord xera in man a Smendes, che diventarà el primo faraone del la ventunesima dinastia, el primo del terzo periodo intermedio.
L’ultimo faraone de la ventunesima dinastia, Pusennes II, gavea on generale de origine libia, che ga tolto e poder co el nome de Shoshenq I. Sta dinastia ga dovù ritirarse da la Nubia e combatar co vari grupi che volea destabilisar el Egito. En Nubia, na dinastia locale ga tolto el poder e i ga scominsià a movarse verso nord, ocupando prima l’Egito del sud, e dopo tuto el paexe. La venticinquesima dinastia de faraoni xera neri nubiani. Verso el 700 a.C., l’Egito gavea perso forza e prestigio, e la nova forsa internasional xera l’Asiria. Dopo verghe vinto varie bataglie, i asiri ga ocupà Tebe e sachegià Menfis. I asiri ga anca meso al poder la ventiseiesima dinastia come re vasali de la Asiria dal 664 a.C. in poi.
Psamtik I, co i so 54 ani de regno, xe stà bon de rimetar ordine in Egito e de conquistar on margine de indipendensa che la durò fin al 526 a.C. Dopo sta data, i egisiani no xe stà pi boni de contrastar asiri e persiani. Inte el 380 la trentesima dinastia xe stà l’ultima de faraoni egisiani a governar l’Egito, anca se come vasali de la Persia.
Alesandro el Grande l’è rivà in Egito inte el 332 a.C. e no ga vù resistenza a la conquista del paexe. Dopo verghe fondà la nova cavedal, Alesandria d’Egito, ga meso Cleomenes a la guida del paexe mentre che lu andava a combatar contro i fenici. Dopo la morte de Alesandro, Tolomeo ga tolto el so posto in Egito, e ga stabilio la so dinastia, che controlarà el paexe par tre secoli.
La nova potenza mediteranea, Roma, sa catà a far guera contro Marco Antonio e la so aleata, la regina Cleopatra de i Tolomei. Vinta la batalia de Anzio inte el 30 a.C., i romani se sa ciapà el control de l’Egito. Co la division de l’impero romano, l’Egito l’era controlà da Bisanzio, fin a l’arivo de i arabi in tel 639 d.C.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
