![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/77/Blausen_0817_SmallIntestine_Anatomy.png/640px-Blausen_0817_SmallIntestine_Anatomy.png&w=640&q=50)
Intestin tenue
From Wikipedia, the free encyclopedia
L'intestin tenue, che el vien ciamà pìcolo intestin anca se'l xe la parte più longa, ma streta, del buelo, xe n'òrgano del'aparato degerente catà in intrà el stómego e l'intestin crasso. Entèrico' xe l'ajetivo, derivà dal grego, che el vien doparà i relassion a sto trato del canale alimentare, mentre co intestinale se signa sto qua conpagno al grosso intestin. L'intestin tenue xe longo su par zo 7 metri, de sòlito, co un diàmetro mèdio de 2,5 cm, in deminussion manman che se va vanti da le do struture che elo demarca, el piloro a monte e la vàlvola ileo-cecale a vale. St'òrgano el saria da considarare la parte fondamentale del'intiero aparato parché xe qua che i processi degestivi i riva al ponto in tel quale le sostanse nudrigadive (e la mazoransa de quele miga nudrigadive) le poe passare traverso la parede a la circolassion sanguigna e linfàtica, o sia le vien assorbie.
![Thumb image](http://upload.wikimedia.org/wikipedia/commons/thumb/7/77/Blausen_0817_SmallIntestine_Anatomy.png/640px-Blausen_0817_SmallIntestine_Anatomy.png)
![Thumb image](http://upload.wikimedia.org/wikipedia/commons/thumb/7/7c/Human_duodenum.jpg/320px-Human_duodenum.jpg)
![Thumb image](http://upload.wikimedia.org/wikipedia/commons/thumb/b/be/Normal_Small_Intestine_Mucosa_%285916217283%29.jpg/640px-Normal_Small_Intestine_Mucosa_%285916217283%29.jpg)
L'assorbimento del magnare xe fato co granda eficensa a sto livelo parché la superfisse messa a desposission la deventa zigante par i repiegamenti de la parede. Par drento se vede la desposission a pieghe semilunari, più evidente a livelo duodenale, la desconpare a livelo ileale; su tuta sta superfisse ghe xe pìcoli solevamenti de mucosa a forma de deo, ciamadi vili; infin le stesse sèlule epiteliali sul versante luminale le slarga la superfisse de contato co la so menbrana selulare che la se alsa in microvili.
L'anatomia micròscopica la vede qua, come in altre parte del tubo degestivo, na parede fata de quatro tònaghe soraposte. La mucosa la xe formada da n'epitelio colonare a sìngolo strato co sèlule ciamade enterociti, come za dito fortemente specializade inte l'assorbimento de sostanse nudrigadive e miga nudrigadive (aqua, vitamine, sali minerali); soto ghe xe la làmina propia e la muscularis mucosae che la se stende par su fasendo da asse fondante el vilo. La sotomucosa la ga drento el plesso sotomucoso de Meissner e la muscolare el plesso mioentèrico de Auerbach (i costituisse el sistema nervoso entèrico). Infin gavemo la tònega aventissia che la poe èssare ciamada sierosa inte la mazoransa del vìssere che la xe querta da peritoneo.