From Wikipedia, the free encyclopedia
El cardenałe (el tìtuło formałe intiero el ze cardenałe de Santa Romana Ceza, in latin: Sanctae Romanae Ecclesiae Cardinalis[1]) inte ła Ceza catòłega el ze un prełà dezignà dal papa, al cuało el ghe ze suito soto inte ła zerarchia catòłega, so direto cołaboratore in acordo col còdaze de derito canònego[1]. Sta cołaborasion ła se ezèrsita cuerzendo i pì inportanti incarghi inte ła Cùria romana (prezidensa de òrgani o dicasteri) o sanò cofà véscovi de łe diòcezi inportanti inte el mondo, considerae cardenałìsie par inportansa o tradision ecleziałe.
I cardenałi inte ła so union i forma el cołejo cardenałìsio, presiedesto dal cardenal decan, e ła so reunion soto ła presidensa del papa ła ze dizesta concistoro. I cardenałi rezidenti inte ła Sità del Vategan o a Roma i otegne ła sitadinansa del Stato de ła sità del Vategan.
Ai cardenałi, dopo ła morte o ła renunsa del pontèfego, conpete in pì l'ełesion del novo véscovo de Roma inte na asenblea dizesta conclave. Anca se de norma el papa el vien decidesto intrà i cardenałi stesi, de iure podaria vegner sełesionà anca un òmo sèłebe e batezà, esterior al cołejo cardenałìsio; tutavia tal evegnensa inte ła stòria de ła Ceza ła ze avegnesta racuanto de raro.
Drio del Catechismo de ła Ceza Catòłega (n. 1536), el sacramento del ministero apostòłego el conporta trè gradi: episcopà, presbiterà, diaconà[2]: ła dignità cardenałìsia no ła vien de consevensa un ministero ordenà (no el ghe ze mai sta un sacramento par ła dignità e l'ufiso del cardenałe) e no el re-entra inte ła strutura zeràrchega "de derito divin" (o sia cueła che ła Ceza ła pensa èsare stada istituia diretamente da Jezù Cristo).
I chièreghi erlevai a ła dignità cardenałìsia, a l'episcopà, o ecuiparai al véscovo diocezan, i ze obligai personalmente a ła profesion de fede[3], ła cuała fòrmuła, in vigor partindo dal 1º de marso del 1989, ła ze conponesta dal sìnboło niseno-costantinopułitan sevità da ła profesion de fede inte ła Paroła de Dio scrivesta o trasmetesta (cofà: Sacre Scriture, Concili, Pari), e inte i dogmi proclamai dal Mazistero ordenàrio e universałe[4]. El respetivo ministero el ze ezersità co dilizénsia e fedeltà in magnera conformada al mandà apostòłego de servìsio e de edifegasion pastorałe miranti a ła comunion diacrònega dei credenti in Jezù Cristo[5].
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
