![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/1/14/Persepolis_24.11.2009_11-12-14.jpg/640px-Persepolis_24.11.2009_11-12-14.jpg&w=640&q=50)
آل مظفر
From Wikipedia, the free encyclopedia
آل مظفر 1315ء سے 1393ء تک ایران میں زیر اقتدار ایک حکومت تھی جس کا بانی ایک ایرانی امیر مظفر تھا جو ایل خانی حکومت کی طرف سے شہر یزد کا حاکم تھا۔ 1315ء میں سلطان ابو سعید نے اس کے لڑکے مبارز الدین محمد کو یزد اور فارس کی حکومت دے دی اور وہ ایل خانیوں کے زوال کے بعد آزاد ہو گیا۔ اس نے 1340ء میں کرمان، 1353ء میں شیراز اور فارس اور 1357ء میں اصفہان پر قبضہ کر لیا۔ مبارز الدین کا دور اس لحاظ سے بھی اہم ہے کہ اس نے شراب خوری اور دوسری برائیوں کو جو شیراز میں اس زمانے میں عام ہو گئی تھیں، روکا اور اس مقصد کے لیے سخت قوانین نافذ کیے۔
مبارز الدین کے بعد شاہ شجاع (1357ء تا 1384ء) جانشیں ہوا جو اس خاندان کا سب سے ممتاز حکمران ہے۔ اس نے عراق کے جلائر حکمران سلطان اویس کے 1375ء میں انتقال کے بعد شستر، بغداد، سلطانیہ، تبریز، نخچوان اور قرہ باغ پر بھی قبضہ کر لیا اور اس طرح وہ خراسان کو چھوڑ کر پورے ایران پر قابض ہو گیا۔ یہ وہ زمانہ تھا جب تیمور سمرقند میں ایک مضبوط حکومت قائم کرچکا تھا اور خراسان پر قابض ہو چکا تھا۔ شاہ شجاع نے اس کی بڑھتی ہوئی قوت کا اندازہ لگاکر اس کی اطاعت کرلی۔
شاہ شجاع کے بعد اس کا جانشیں زین العابدین (1384ء تا 1387ء) صرف تین سال حکمران رہا۔ 1387ء میں تیمور نے اس کو نکال دیا۔ اس کے بعد آل مظفر کے شہزادوں میں خانہ جنگی شروع ہو گئی۔ یزد میں شاہ یحیی، کرمان میں سلطان احمد اور اصفہان میں شاہ منصور حکومت کرنے لگے۔ اس خانہ جنگی سے فائدہ اٹھاکر تیمور نے 1393ء میں آل مظفر کی حکومت کا خاتمہ کر دیا