Удмурт Элькунысь Йӧскалык музей

Удмурт Элькунысь Йӧскалык музей — Удмуртиысь валтӥсь музейёс пӧлысь одӥгез. Ижкарлэн шораз интыяськемын, Ижысь Арсеналлэн юртаз (Президент дворец сьӧрын).

Музейлэн пырон интыез, 2006-тӥ ар

Историез

1920-тӥ арын шуркынмон толэзе интыысь улосвылъя Ижевской музей выллем кылдытэмын, 1929-1934-тӥ аръёсы — Вотской автономной улосвыллэн шаретодонъя областной музеез, 1935-1947-тӥ аръёсы — УАССР-ысь шаертодонъя музей, 1947-1995-тӥ аръёсы — Удмурт Элькунысь шаертодонъя музей, 1995-тӥ арысен пӧсьтолэзьысен — Удмурт Элькунысь Йӧскалык музей.

Музейлэн экспозициосыз пӧртэм дыре пӧртэм интыын возиськизы: 1920-1926-тӥ аръёсы — национализированной лютеран кирхаын (Советской урамын Горд но Карл Маркс нимо урамъёс вискын), 1931-1932-тӥ аръёсы — Александро-Невской соборын, 1932-1937-тӥ аръёсы — Михайловской соборын, 1937-1939-тӥ аръёсы — К. Маркс нимо ульчаысь 23-тӥ номеро юртын. 1939-тӥ арысен куарусён толэзьысен музейлэн коллекциосыз Сарапулысь шаертодонъя музее нуэмын (Первомайской урам, 68-тӥ номеро юрт). 1945-тӥ арын музей понна Ижкарын юртъер висъямын (Ленин урамысь 180-тӥ номеро юрт, 1970-тӥ арысен — Сивковлэн урамаз). 1970-тӥ арысен музей Арсеналлэн юртъераз (Ижкарысь пыӵал лэсьтон заводлэн) интыямын. Музейлэн азинсконаз туж бадӟым юрттэт директоръёсыз: А. М. Филимонов (1920-1922-тӥ аръёс), К. П. Чайников — Кузебай Герд (1925-тӥ арысен инвожо толэзьысен 1926-тӥ арозь куарусён толэзёзь), М. И. Ильин (1926-1932-тӥ аръёс), Т. А. Шилова (1982-1997-тӥ аръёс).

Музейлэн экспозициосыз

Этнографической но антропологической материал бичанъя нырысетӥ экспедиция Кузебай Гердлэн кивалтэмез улсын 1926-тӥ арын Вавож ёросысь Малиновка гуртын радъямын, 1930-тӥ арын та выллем экспедициос, Москваысь но Ленинградысь тодосчиослэн пыриськеменызы, Пичи-Пурга, Можга но Глазов ёросъёсын ортчытэмын вал. 50-тӥ аръёслэн шор вадесысенызы кутскыса музей арлы быдэ 3-5 экспедициос радъялляз — археологической, этнографической, историческо-бытовой, естественно-научной но мукет. 1997-тӥ ар азелы 1-тӥ толшор толэзьлы музейлэн инъет фондаз 131 434 возён единица лыдъяське вал. Туж дуно луо удмурт калыклэн археологиезъя но этнографиезъя люкам арбериос, 19-20-тӥ дауръёсысь гурт но кар улонысь котыр; Ижкарын но тужгес но умойёсаз западно-европейской фирмаосын лэсьтэм пыӵал-тӥрлыкъёс — пӧйшуран но огшоры пыӵалъёс; бадӟым калибрен кузь гумыё пыӵалъёсын коллекция; промышленностьлэн, гурт хозяйстволэн, калык дышетонлэн, тазалык утёнлэн историзыя фотографиосын но ужкагазъёсын люкам коллекция; тодмо шаерчиосмылэн асьсэ киын люкам (личной) фондъёссы; Быдӟым Отечественной ожгаръя материалъёсын коллекция; удмурт суредасьёслэн но скульпторъёслэн произведениоссы.

1970-1984-тӥ аръёсы Арсеналлэн юртъераз (Коммунаръёслэн урамысьтызы 287-тӥ номеро юрт) улосвыллэн историезлы сӥзем экспозиция ужаз. 1989-тӥ арын Г. Д. Красильников писательлэн квартира-музеез кылдытэмын (Ижкарысь М. Горькийлэн урамысьтыз 45-тӥ номеро юртын). 1984-тӥ арысен Удмурт Элькунысь Завьял ёросысь Ильинка гурт дорын усьтэмы инбам улын Архитектурно-этнографической музеез лэсьтон мынэ. Музейлэн Удмуртилэн ёрос шоръёсаз но мукет каръёсаз трос филиалъёсыз усьтэмын:

• 1968-тӥ арын — Глаз карлэн шаертодонъя музеез (1992-тӥ арысен музей ас кожаз каремын, 1997-тӥ арысен пӧсьтолэзьысен — Удмурт Элькунысь «Иднакар» нимо историко-культурной музей-заповедник);
• 1972-тӥ арын — Вотка карлэн шаертодонъя музеез (1994-тӥ арысен ас кожаз каремын, Воткаысь шаертодонъя музей);
• 1978-тӥ арын — Ува посёлокын «Декоративно-прикладной искусствоя» музей;
• 1979-тӥ арын — Можга карын «Удмурт калык творчество» нимо музей;
• 1990-тӥ арын — Кизнер посёлоклэн шаертодонъя музеез (1996-тӥ арысен — ас кожаз каремын, ёрос музей);
• 1978-тӥ арын — Алнашысь огазеям историко-литературной музей (1991-тӥ арысен — Йӧскалык музейлэн филиалэз, кудаз куинь музей пыремын: нырысетӥез — Ашальчи Окилэн Мемориальной музей-коркаез, 1987-тӥ арын усьтэмын со коркан, кудаз 1952-1973-тӥ аръёс ӵоже тодмо кылбурчи улӥз — 500-лэсь трос арбери люкамын; 2-тӥез — Г. Д. Красильниковлэн Мемориальной музей-коркаез — Алнаш черкогуртысь Красильниковлэн урамысьтыз 16-тӥ номеро юрт, 1989-тӥ арын усьтэмын со коркан, кудаз 1959-1963-тӥ аръёсы гожъяськись улӥз — 300-лэсь трос арбери люкамын; 3-тӥез — Историко-краеведческой отдел, 1987-тӥ арын усьтэмын вал Удмурт Элькунысь изобразительной искусствоосъя музейлэн филиалэз выллем. Адӟытоннилэн быдӟалаез 112 м²);
• 1998-тӥ арын — Вавож ёросысь Гурезь-Пудга гуртын Кузебай Гердлэн музеез.

Литература

• Республиканский краеведческий музей: Путеводитель. Ижевск, 1972.
• Вопросы истории и культуры Удмуртии. Ижевск, 1986.
• Удмуртия: новые исследования. Ижевск, 1990.