Pondo ng Monetaryong Pandaigdig

Ang Pondo ng Monetaryong Pandaigdig (Ingles: International Monetary Fund; IMF) ay pangunahing ahensya sa pananalapi ng mga Nagkakaisang Bansa, at isang pandaigdigang institusyong pampananalapi na pinopondohan ng 190 bansang kasapi at may punong-tanggapan sa Washington, D.C., Estados Unidos. Ito ay itinuturing na kahuli-hulihang tagapagpahiram sa mga pambansang pamahalaan, at nangungunang tagasuporta ng katatagan ng halaga ng palitan. Ang nakasaad na misyon nito ay "magtrabaho upang pasiglahin ang pandaigdigang kooperasyon sa pananalapi, tiyakin ang katatagan sa pananalapi, pagaanin ang internasyonal na kalakalan, itaguyod ang mataas na empleo at likas-kayang paglago ng ekonomiya, at bawasan ang kahirapan sa buong mundo."^[1][9]

Pondo ng Monetaryong Pananalapi

Ang Selyo ng Pondo ng Monetaryong Pananalapi
Punong-tanggapan sa Washington, D.C.
Daglat	IMF
Pagkakabuo	1 Hulyo 1944; 80 taon na'ng nakalipas (1944-07-01)
Uri	Pandaigdigang institusyon sa pananalapi
Layunin	Isulong ang internasyonal na kooperasyon sa pananalapi, pagaanin ang kalakalang internasyonal, itaguyod ang likas-kayang paglago ng ekonomiya, gawing aksesible ang mga rekurso sa mga miyembrong nahihirapan sa timbangang-bayad, maiwasan at tumulong sa pagbangon mula sa mga internasyonal na krisis sa pananalapi[1]
Punong tanggapan	700 19th Street NW, Washington, D.C., U.S.
Coordinate	38°53′56″N 77°2′39″W
Rehiyon	Buong mundo
Kasapihip	191 bansa (190 bansang UN at Kosobo)[2]
Wikang opisyal	Ingles[3]
Namamahalang Direktor	Kristalina Georgieva
Unang Diputado ng Namamahalang Direktor	Gita Gopinath[4]
Punong Ekonomista	Pierre-Olivier Gourinchas[5]
Main organ	Lupon ng mga Gobernador
Parent organization	Mga Nagkakaisang Bansa[6][7]
Badyet (2023)	$1,295 milyon[8](p60)
Tauhan	3,100[1]
Website	imf.org

Itinatag noong Hulyo 1944^[10] sa Kapulungan sa Bretton Woods, pangunahin ayon sa mga ideya nina Harry Dexter White at John Maynard Keynes, nag-umpisa ito sa 29 bansang kasapi at sa layunin na muling buuin ang pandaigdigang sistema ng pananalapi pagkatapos ng Ika-2 Digmaang Pandaigdig. Sa mga unang taon nito, pangunahing nakatuon ang IMF sa pagpapadali sa mga nakapirming halaga ng palitan sa buong maunlad na mundo.^[11] Ngayon mayroon itong mahalagang papel sa pamamahala ng mga suliranin sa timbangang-bayad at mga pandaigdigang krisis sa pananalapi.^[12][11] Sa pamamagitan ng sistemang kota, nag-aambagan ang mga bansa sa isang pondohang mapaghihiraman ng mga bansa kung makaranas sila ng mga problema sa timbangang-bayad. Kumikilos ang IMF upang patatagin at pasiglahin ang mga ekonomiya ng mga bansang kasapi nito sa paggamit ng pondo, pati na rin sa pamamagitan ng mga ibang aktibidad tulad ng pagtitipon at pagsusuri ng mga estadistikang ekonomiko at pagsubaybay sa mga ekonomiya ng mga miyembro nito.^[13][14]

Ang kasalukuyang namamahalang direktor at tagapangulo ng IMF ay ang Bulgarang ekonomista na si Kristalina Georgieva, na humawak sa tungkulin mula noong Oktubre 1, 2019.^[15] Hinirang ang Indiyanang-Amerikanang ekonomista na si Gita Gopinath, ang dating punong ekonomista, bilang unang diputada ng namamahalang direktor, epektibo noong Enero 21, 2022.^[4] Hinirang si Pierre-Olivier Gourinchas bilang punong ekonomista noong Enero 24, 2022.^[5]

Sa kabila ng nakasaad na misyon nito, malawakang pinipintasan ang IMF para sa mga patakarang nagsesentralisa ng pagpapasiya sa ekonomiya, nagpapataw ng mga kondisyon na naglilimita sa pambansang soberanya, at nagpapatatag ng impluwensiya ng mga makapangyarihang pamahalaan sa mga bansang umuunlad.^[16] Nangangatuwiran ng mga nambabatikos na kadalasang inuuna ng mga interbensiyon nito ang katatagan ng mga institusyong pampinansiyal kaysa sa mga indibidwal na kalayaan sa ekonomiya, na naglilimita sa kakayahan ng mga lokal na merkado na magtuwid nang sarili at umunlad sa organikong paraan.^[17][18] Bukod pa rito, di-katugmang pinapaboran ng istraktura ng pamamahala nito ang mga mas mayayamang bansa, lalo na ang Estados Unidos, na nakakabahala tungkol sa di-nararapat na impluwensiyang pampolitika sa pandaigdigang sistema ng pananalapi.^[19]