ఘన పదార్థం
From Wikipedia, the free encyclopedia
పదార్థానికి ఉన్న నాలుగు ప్రాథమిక స్థితులలో ఘనం ఒకటి. మిగిలినవి ద్రవ, వాయు, ప్లాస్మా స్థితులు. ఘనపదార్థంలోని అణువులు ఒకదానికొకటి దగ్గరగా వత్తుకుని ఉండి, తక్కువ గతిశక్తిని కలిగి ఉంటాయి. నిర్మాణాత్మక దృఢత్వం, ఉపరితలంపై పనిచేసే బలాన్ని ప్రతిఘటించడం ఘనపదార్థ లక్షణాలు. ద్రవం వలె కాకుండా, ఒక ఘన వస్తువు అది ఉన్న పాత్ర ఆకారాన్ని పొందదు, లేదా వాయువు వలె అందుబాటులో ఉన్న మొత్తం ఘనపరిమాణాన్ని పూరించేలా విస్తరించదు. ఘనపదార్థంలోని పరమాణువులు ఒకదానికొకటి కట్టుబడి సాధారణ రేఖాగణిత లాటిస్ లాగా (స్ఫటికాకార ఘనపదార్థాలు, ఇందులో లోహాలు, సాధారణ మంచు ఉంటాయి) లేదా అవక్రమంగా (కిటికీ గ్లాసు వంటి నిరాకార ఘనపదార్థం) ఉంటాయి. ఘనపదార్థాలు తక్కువ పీడనం వద్ద సంకోచం చెందవు. వాయువుల లోని అణువులు విరళంగా ఉంటాయి కాబట్టి వాయువులను తక్కువ పీడనంతోనే కుదించవచ్చు.
ఘనపదార్థాలతో వ్యవహరించే భౌతిక శాస్త్ర శాఖను ఘన-స్థితి భౌతిక శాస్త్రం (సాలిడ్ స్టేట్ ఫిజిక్స్) అని పిలుస్తారు. ఇది ఘనీభవించిన పదార్థ భౌతికశాస్త్రం (కండెన్స్డ్ మ్యాటర్ ఫిజిక్స్ దీనిలో ద్రవాలు కూడా ఉంటాయి) లోని ప్రధాన శాఖ. మెటీరియల్ సైన్స్ ప్రధానంగా ఘనపదార్థాల భౌతిక, రసాయన లక్షణాలకు సంబంధించినది. సాలిడ్-స్టేట్ కెమిస్ట్రీ ప్రత్యేకించి కొత్త పదార్థాల సంశ్లేషణకు, అలాగే కొత్త పదార్థాల గుర్తింపుకూ రసాయన కూర్పుకూ సంబంధించిన శాస్త్రం.