వికీపీడియా:వాడుకరి నిరోధ నిర్ణయాల సమీక్ష
From Wikipedia, the free encyclopedia
తెవికీలో నిర్వాహకులు అమలు చేసే నిరోధం వంటి నిర్ణయాలు ఒకరో అంతకంటే ఎక్కువ మందో వాడుకరులను ప్రభావితం చేస్తాయి. ఆ నిర్ణయాలకు గురైన ఆయా వాడుకరులు నిర్ణయంపై విభేదించవచ్చు. అలాంటి సందర్భాల్లో బాధితులకు తరుణోపాయాన్ని ఈ విధానం సూచిస్తుంది.
ఈ పేజీ వికీపీడియా విధానాలలో ఒకటి. ఇది సభ్యులందరూ సాధారణంగా పాటించవలసినదిగా సర్వామోదం పొందిన ప్రమాణాలను వివరించే పేజీ. ఈ విధానానికి మార్పులు కేవలం ఏకాభిప్రాయం ద్వారానే సాధ్యం. |
తనపై విధించిన నిరోధాన్ని పునస్సమీక్షించమని బాధితుడు నిరోధం విధించిన నిర్వాహకుని కాకుండా ఇతర నిర్వాహకులను కోరవచ్చు. ఈ కొత్త నిర్వాహకులు నిరోధ నిర్ణయం తీసుకున్న చర్చలో పాల్గొని ఉండకూడదు. అయితే తెవికీలో చురుగ్గా ఉండే వాడుకరుల సంఖ్యను గమనిస్తే, అలాంటి జోక్యం చేసుకోకుండా ఉన్న నిర్వాహహకులు ఉండకపోయే అవకాశం ఎక్కువగా ఉంది. ఈ సందర్భంలో బాధితులకు మరొక అవకాశం కలిగించడమే ఈ విధాన ఉద్దేశం. ఇంగ్లీషు వికీపీడియాలో ఉన్నట్లుగా తెవికీలో ఆర్బిట్రేషన్ కమిటీ లేదు. కమిటీని ఏర్పాటు చేసుకునేంత సంఖ్యలో అనుభవమున్న వాడుకరులు లేరు.
పై అంశాలను దృష్టిలో ఉంచుకుని నిర్వాహకులు తిసుకునే నిరోధ నిర్ణయాలపై ఒక సమీక్షా విధానాన్ని ఏర్పరచుకోవడమే ఈ ప్రతిపాదన పేజీ ఉద్దేశం. దీని కోసం ఒక సంఘాన్ని ఏర్పరచుకోవాలని సముదాయం సూత్రప్రాయంగా నిశ్చయించింది. తత్ప్రకారం ఒక ఈ సంఘ నిర్మాణం, దాని హోదా, పని మార్గదర్శకాలు వగైరాలపై సముదాయం చర్చించి, ఆమోదించింది. తదనుగుణంగా, 2020 సెప్టెంబరు 29 న ఈ విధానం అమల్లోకి వచ్చింది.