బాష్ప వాయువు
From Wikipedia, the free encyclopedia
బాష్ప వాయువు అంటే విపరీతంగా కళ్ళలో మంట, కళ్ళలో నీళ్ళు తిరిగేలా చేయగల రసాయనాల మిశ్రమం. దీన్ని లాక్రిమేటరీ ఏజెంట్ అని కూడా అంటారు. లాటిన్లో లాక్రిమా అంటే కన్నీరు అని అర్థం. దీనివల్ల ఒక్కోసారి స్వల్పంగా దురద, శ్వాస సంబంధిత ఇబ్బందులు కూడా కలుగుతాయి. దీన్ని సాధారణంగా పోలీసులు ఆందోళనకారులను చెదరగొట్టడానికి ఉపయోగిస్తారు. దీని వల్ల కలిగే ప్రభావాలు కేవలం తాత్కాలికం మాత్రమే. కొన్ని నిమిషాలలోనే ఈ లక్షణాలు నుంచి పూర్తిగా కోలుకొనవచ్చు. గ్యాస్ మాస్క్ వాడటం ద్వారా బాష్ప వాయు ప్రయోగం నుంచి తప్పించుకోవచ్చు. కొన్ని సందర్భాల్లో ఇది తీవ్రమైన కంటి నొప్పి, శ్వాసకోశ నొప్పి, చర్మపు చికాకు, రక్తస్రావం, అంధత్వానికి కూడా దారితీస్తుంది.
లాక్రిమేటరీ ఏజెంట్లను సాధారణంగా అల్లర్ల నియంత్రణ కోసం పోలీసులు వాడుతారు. అయితే యుద్ధాల్లో దీనిని ఉపయోగించడాన్ని వివిధ అంతర్జాతీయ ఒప్పందాల ద్వారా నిషేధించారు.[NB 1] మొదటి ప్రపంచ యుద్ధ సమయంలో, విషపూరితమైన, ప్రమాదకరమైన లాక్రిమేటరీ ఏజెంట్లను ఉపయోగించారు.
బాష్ప వాయువులకు గురికావడం వల్ల అనేక స్వల్పకాలిక, దీర్ఘకాలిక ఆరోగ్య ప్రభావాలు ఏర్పడవచ్చు. ముఖ్యంగా అధిక సాంద్రతలలో బాష్ప వాయువుకు గురికావడం, ధరాళంగా గాలి వీచని మూసేసిన ప్రదేశాల్లో బాష్ప వాయువుకు గురైనపుడు.. శ్వాసకోశ వ్యాధులు, తీవ్రమైన కంటి వ్యాధులు (ఆప్టిక్ న్యూరోపతి, కెరాటిటిస్, గ్లాకోమా, కంటిశుక్లం వంటివి), చర్మవ్యాధులతో సహా మరణం కూడా సంభవించవచ్చు.[1]