![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/ca/World_zoo.png/640px-World_zoo.png&w=640&q=50)
జంతు ప్రదర్శనశాల
జంతువులను సంరక్షణ చేస్తూ, ప్రజల ప్రదర్శనకోసం జంతువులన్నింటిని ఒకచోట ఉంచే ప్రదేశం. / From Wikipedia, the free encyclopedia
జంతు ప్రదర్శనశాల, జంతువులను సంరక్షణ చేస్తూ, ప్రజల ప్రదర్శనకోసం జంతువులన్నింటిని ఒకచోట ఉంచే ప్రదేశం. కొన్ని సందర్భాల్లో జంతువుల పెంపకం చేయడం జరుగుతుంది.
"జూలాజికల్ గార్డెన్" అనే పదం జంతుశాస్త్రం, జంతువుల అధ్యయనాన్ని తెలియజేస్తుంది. ఈ పదాన్ని గ్రీకుభాషలోని జూన్ (జంతువు), లోజియా (అధ్యయనం) అనే పదాల నుండి తీసుకోబడింది. "జూ" అనే పదాన్ని మొదట లండన్ లోని జూలాజికల్ గార్డెన్స్ కోసం ఉపయోగించారు. 1828లో శాస్త్రీయ అధ్యయనం కోసం, 1847లో ప్రజల కోసం ఈ గార్డెన్స్ తెరవబడింది.[1] అమెరికా సంయుక్త రాష్ట్రాలలో ఏటా 181 మిలియన్ల మంది జంతు ప్రదర్శనశాలలను సందర్శిస్తారు.[2]
![Thumb image](http://upload.wikimedia.org/wikipedia/commons/thumb/c/ca/World_zoo.png/640px-World_zoo.png)
![Thumb image](http://upload.wikimedia.org/wikipedia/commons/thumb/6/61/Siperiantiikeri_Korkeasaari.jpg/640px-Siperiantiikeri_Korkeasaari.jpg)
1828లో లండన్ జంతు ప్రదర్శనశాల ప్రారంభమైన తరువాత దీనిని జులాజికల్ గార్డెన్ అని పిలిచేవారు. 1847లో యునైటెడ్ కింగ్డమ్లో మొదటిసారిగా ‘జూ’ అనే పదాన్ని ఉపయోగించి, క్లిఫ్టన్ జూ అనే పేరు పెట్టారు. ఇరవయ్యేళ్ల అనంతరం మ్యూజిక్ హాల్ కళాకారుడు ఆల్ఫ్రెడ్ వాన్స్ రూపొందించిన ‘వాకింగ్ ఇన్ ద జూ ఆన్ సన్డే’ గీతంలో ఈ 'జూ' అనే పదాన్ని వాడడం ద్వారా ఈ పదం ప్రాచుర్యం పొందింది.[3] 1891లో వాషింగ్టన్ డిసిలోనూ, 1899లో న్యూయార్క్లోని బ్రాంక్స్లోనూ ప్రారంభించబడిన పార్కు కోసం ‘జులాజికల్ పార్క్’ అనే పదం వాడబడింది.[4]
20వ శతాబ్దం చివరలో ‘అభయారణ్యాలు’ లేదా ‘జీవావరణాలు’ అనే పదాలు జంతు ప్రదర్శనశాలలకు పర్యాయ పదాలుగా ఉపయోగించడం ప్రారంభమైంది. 19వ శతాబ్దంలో కొంతమంది జూ నిపుణులు తమ సంస్థలను రోజువారీ మూస విధానం నుంచి దూరం చేయాలన్న ఆలోచనతో ఈ కొత్తపదాన్ని పుట్టించారు.[5] 1980 దశాబ్దం చివరలో వాషింగ్టన్ డిసిలోని నేషనల్ జూ యాజమాన్యం "జీవారణ్యం" అనే పదాన్ని ప్రాచుర్యంలోకి తెచ్చింది.[6] 1993లో న్యూయార్క్ జూలాజికల్ సొసైటీ పేరును వన్యప్రాణుల సంరక్షణ సొసైటీగా మార్చుకొని, దాని పరిధిలోని జంతు ప్రదర్శనశాలలను "వన్యప్రాణుల సంరక్షణ పార్కులు"గా మార్చింది.[7]