చమురు ఒలకడం
మానవ కార్యకలాపాల కారణంగా, పెట్రోలియం హైడ్రోకార్బన్ ద్రవాలు పర్యావరణంలోకి, ముఖ్యంగా సముద్ర ప / From Wikipedia, the free encyclopedia
మానవ కార్యకలాపాల కారణంగా, పెట్రోలియం హైడ్రోకార్బన్ ద్రవాలు పర్యావరణంలోకి, ముఖ్యంగా సముద్ర పర్యావరణ వ్యవస్థ లోకి, విడుదలవడమే చమురు ఒలకడం. ఇది ఒక రకమైన కాలుష్యం. ఈ పదం సాధారణంగా సముద్ర జలాల్లోకి, తీర ప్రాంత జలాల్లోకీ చమురు ఒలకడాన్ని వివరించడానికి వాడతారు. అయితే భూమిపై కూడా చమురు ఒలకడం జరగవచ్చు. ట్యాంకర్లు, ఆఫ్షోర్ ప్లాట్ఫారాలు, డ్రిల్లింగ్ రిగ్గులు, చమురు బావుల నుండి ముడి చమురు ఒలికిపోవచ్చు, శుద్ధి చేసిన పెట్రోలియం ఉత్పత్తులు ( గ్యాసోలిన్, డీజిల్ వంటి), వాటి ఉప-ఉత్పత్తులు, పెద్ద నౌకలు ఉపయోగించే భారీ ఇంధనాలూ ఒలికిపోవచ్చు. వ్యర్థ నూనె ఏదైనా ఒలికిపోవచ్చు.
ఒలికిన చమురు పక్షుల ఈకల్లోకి, క్షీరదాల బొచ్చు లోకీ చొచ్చుకుపోయి, దాని ఇన్సులేటింగ్ సామర్థ్యాన్ని తగ్గిస్తుంది. దాంతో ఉష్ణోగ్రత లోని హెచ్చుతగ్గులకు అవి తట్టుకోలేక పోతాయి. నీటిలో తేలడం వాటికి కష్టమౌతుంది. చమురును తొలగించి, శుభ్రపరచడం కష్టమైన పని. అది ఒలికిన చమురు రకం, నీటి ఉష్ణోగ్రత (బాష్పీభవనం, జీవఅధోకరణాన్ని ప్రభావితం చేస్తుంది), తీరప్రాంతాలూ బీచ్ల రకాలు.. వంటి అనేక అంశాలపై ఆధారపడి ఉంటుంది. [1] చమురును తొలగించి శుభ్రం చేయడానికి వారాలు, నెలలు, సంవత్సరాలైనా పట్టవచ్చు. [2]
ఒలికిన చమురు సమాజానికి ఆర్థికంగా, పర్యావరణపరంగా, సాంఘికంగా వినాశకరమైన పరిణామాలను తెస్తుంది. తత్ఫలితంగా, చమురు ప్రమాదాలు మీడియా దృష్టిని ఆకర్షించి, రాజకీయ గడబిడను రేపాయి. చమురు ఒలకడంపై ప్రభుత్వ ప్రతిస్పందనకు సంబంధించిన రాజకీయ పోరాటంలో చాలా మంది ఏకతాటిపైకి వచ్చారు. ఏయే చర్యలు తీసుకుంటే ఈ ప్రమాదాలు జరగకుండా నిరోధించగలమనే విషయంపై ఆలోచించారు. [3]