கொங்கை
மாந்த இனத்தின்பால்சுரக்கும் உறுப்பு / From Wikipedia, the free encyclopedia
மார்பகம் (மாற்று சொற்கள்: கொங்கை, முலை), பெண் பாலூட்டிகளின் உடலில் மேற்பகுதியில் இரு பக்கங்களிலும் அமைந்து, பாற்சுரப்பியைக் கொண்டு பாற்சுரந்து, குழந்தைகளுக்குப் பாலூட்டப் பயன்படுத்தப்படுகிறது. இருபாலருக்கும் ஒரே கருவியல் இழையங்களில் இருந்து மார்பகங்கள் வளருகின்றன. எனினும், பருவமடையும் போது, பெண்களின் பாலின இயக்குநீர்கள் குறிப்பாக ஈத்திரோசன் மார்பக வளர்ச்சியை ஊக்குவிக்கிறது. ஆனால், ஆண்களில் மிகுந்த அளவு ஆண்மையியக்குநீர் காரணமாக மார்பக வளர்ச்சி ஊக்குவிப்பதில்லை. இதன் விளைவாகப் பெண்களின் மார்பகங்கள் ஆண்களை விட முதன்மை வாய்ந்தாகக் கருதப்படுகிறது.
மார்பகம் கொங்கை, முலை | |
---|---|
விளக்கங்கள் | |
தமனி | உள் மார்புத் தமனி |
சிரை | உள் மார்புச் சிரை |
அடையாளங்காட்டிகள் | |
இலத்தீன் | mamma (mammalis 'மார்பகத்தின்')[1] |
MeSH | D001940 |
TA98 | A16.0.02.001 |
TA2 | 7097 |
FMA | 9601 |
உடற்கூற்றியல் |
ஒவ்வொரு மார்பகமும் 15 முதல் 20 எளிய பாற்சுரப்பிகளைக் கொண்டிருக்கின்றது. தோலடிக் கொழுப்பிழையங்கள் பாற்சுரப்பிகளை உள்ளடக்கி இருப்பதால், மார்பகத்திற்கு அளவும், வடிவமும் கொடுக்கின்றன. ஒவ்வொரு பாற்சுரப்பியும், பாற்சேர்க்கும் சிறுகுழாய்களுடன், முடிவில் பைகளுடன் (லோபூல்) அமைந்துள்ளன; அவை இயக்குநீரின் குறிகைகளுக்கு ஏற்ப பாலை உற்பத்திச் செய்கின்றன. கருவுற்ற காலத்தில் தாய்ப்பாலைச் சுரக்கும் பொருட்டு, அதன் இயக்குநீர்கள் மார்பகத்தில் இழைய வளர்ச்சியும், விரிவாக்கமும் செய்கின்றன. ஈஸ்ட்ரோஜன், புரோஜெஸ்டிரோன், புரோலாக்டின் இம்மூன்று இயக்குநீர்களும் மார்பகத்தில் சுரப்பிழையத்தை உருவாக்குகிறது. மேலும், மாதவிடாய் சுழற்சியின் போது மார்பகத்திலும், கருப்பையிலும் மாற்றங்களை ஏற்படுத்துகின்றன.
பெண்களின் மார்பகங்கள் குழந்தைகளுக்குப் பாலூட்டப்படுவதுடன் அவற்றிற்குச் சமூகம், பாலியல் சிறப்பியல்புகள் உள்ளன. பண்டைய, நவீன சிற்பத்திலும், கலையிலும், நிழற் படக் கலையிலும் மார்பகங்கள் குறிப்பிடத்தக்க வகையில் இடம்பெற்றிருக்கின்றன. ஒரு பெண்ணின் உணர்தலின் படி தங்களின் மெய் உருவத்திற்கும், பாலியல் ஈர்ப்புத்தன்மைக்கும் மார்பகங்களை முதன்மைவாய்ந்ததாகக் கொள்வர். பல மேற்கத்திய பண்பாடுகளில் மார்பகங்களை பாலியலுடனும் இணைப்பதால், உடையற்ற மார்பகங்களை இழிவாகவும், நாணமில்லாத செயலாகவும் கருதுகின்றனர். பெண்களின் மார்பகங்களும், குறிப்பாக முலைக்காம்புகளும் காமவுணர்ச்சிப் பகுதிகளாக உள்ளன. மார்பக அளவிலும், கவர்ச்சியிலும் சில பண்பாடுகளில் முதன்மை கொடுக்கப்படுவதால், பெண்கள் சிலர் தங்கள் மார்பக அளவினைப் பெரியதாகவோ, சரியதாகவோ மாற்றிக்கொள்வதற்கும், மார்பகத்தொய்வினை மாற்றியமைப்பதற்கும் மார்பக ஒட்டுறுப்பு அறுவை மருத்துவத்தை நாடுகின்றனர்.