பொருளியல் பின்னடைவு
From Wikipedia, the free encyclopedia
பொருளியல் பின்னடைவு (economic recession) என்பது, தொடர்ந்து இரண்டு காலாண்டுகளாவது, ஒரு நாட்டின் மொத்த உள்நாட்டு உற்பத்தி குறைவடைதல் என விளக்கப்படுகின்றது. பொதுவாக இதனைக் குறைவான பொருளியல் செயற்பாடுகளைக் கொண்ட காலப்பகுதி எனலாம். இது வணிகச்சுழல் சுருங்குவதைக் குறிக்கிறது. ஐக்கிய அமெரிக்காவின் தேசிய பொருளியல் ஆய்வு நிலையம், பொருளியல் பின்னடைவு என்பது, "பல மாதங்களுக்கு நீடிப்பதும்; பொதுவாக உண்மையான மொத்த உள்நாட்டு உற்பத்தி, உண்மையான தனியாள் வருமானம், வேலைவாய்ப்பு, தொழிற்றுறை உற்பத்தி, மொத்த-சில்லறை வணிகம் போன்றவற்றில் தாக்கம் கொண்டுள்ளதும்; பொருளாதாரம் முழுதும் பரவிக் காணப்படுவதுமான குறிப்பிடத்தக்க பொருளியல் செயற்பாட்டு வீழ்ச்சி" என வரைவிலக்கணம் கூறுகிறது.
பொருளியல் பின்னடைவு, ஒரே நேரத்தில் காணப்படக்கூடிய பல இயல்புகளைக் கொண்டது. வேலைவாய்ப்பு, முதலீடு, நிறுவன இலாபம் என்பன குறைதல் இவ்வியல்புகளுள் அடங்கும். கடுமையான அல்லது நீடித்துச் செல்லும் பின்னடைவு, பொருளியல் தாழ்நிலை (economic depression) எனப்படும்.