சிகரக் கோபுரம்
From Wikipedia, the free encyclopedia
சிகரக் கோபுரம் (Peak Tower) என்பது ஹொங்கொங், ஹொங்கொங் தீவில் உள்ள ஒரு சுற்றுலாப் பயணிகளையும், உள்ளூர் உல்லாசப் பயணிகளையும் கவரும் ஒரு இடமாகும். இந்தக் கோபுரம் கடல் மட்டத்தில் இருந்து 396 மீட்டர்கள் உயரத்திலும், அதேவேளை விக்டோரியா சிகரத்தில் இருந்து 156 மீட்டர்கள் கீழும் ஒரு முனையில், ஒரு செங்குத்தான பள்ளத்தாக்கை நோக்கி கட்டப்பட்டுள்ளது. இந்த சிகரக் கோபுரத்தின் வான்மாடியில் இருந்து பார்த்தால், விக்டோரியா சிகரத்தின் இயற்கை பசுமை அழகையும், கீழே பள்ளத்தாக்கில் ஆயிரக்கணக்கான வானளாவிகளின் செயற்கை அழகையும் ஒரு சேரக் காணலாம். அதுவும் இரவு நேரக் காட்சி காண்போரைக் கொள்ளைக்கொள்ள வைப்பதாகும். இந்தக் கோபுரம் சிறப்பாக ஹொங்கொங் வரும் சுற்றுலாப் பயணிகளை ஈர்ப்பதற்கென்றே கட்டப்பட்ட ஒரு அழகியக் கட்டமாகும். அத்துடன் இந்தக் கோபுரத்திற்குச் செல்வதற்கென சிறப்பு சிகர டிராம் வண்டி சேவை ஒன்றும் உள்ளது. அது செங்குத்தாகச் செல்லும் கம்பித்தடம் டிராம் வண்டிச்சேவை வகையைச் சேர்ந்ததாகும். இந்தச் சிகரக் கோபுரத்திற்கான பயணத்தை மேற்கொள்வோர், அநேகமாக "சிகர டிராம் வண்டி" பயணத்தின் ஊடாகவே செல்வர். எனவே இந்த இரண்டு விடயங்களும் ஹொங்கொங் வரும் சுற்றுலா பயணிகளை ஈர்ப்பவையாகும். அத்துடன் சுற்றுலாப் பயணிகளை ஈர்ப்பதற்கான வேறு பல விடயங்களும் இந்தச் சிகரக் கோபுரத்தின் உள்ளே உள்ளது.
![Thumb image](http://upload.wikimedia.org/wikipedia/commons/thumb/2/23/Peak_Tower.jpg/640px-Peak_Tower.jpg)