வேதிவினை வழிமுறை
From Wikipedia, the free encyclopedia
வேதியியலில், வேதிவினை வழிமுறை என்பது ஒரு ஒட்டுமொத்த வேதிமாற்றம் நிகழ்வதன் தொடக்க வினைகளின் படிப்படியான வரிசை முறையாகும்.[1]
வேதி வினை வழிமுறையானது, ஒட்டுமொத்த வேதிவினையின் ஒவ்வொரு படிநிலையிலும், என்ன நடைபெறுகிறது என்பதை விளக்கமாக விவரிக்க முயற்சி செய்யும் கருத்தியல்ரீதியான அனுமானமாகும். பெரும்பாலான நேரங்களில், பல வேதிவினைகளுக்கு விரிவான வழிமுறைகளை காணக்கூடிய வாய்ப்பில்லை. அனுமானமான வேதிவினை வழிமுறைகள் பின்வரும் கூறுகளைளக் கருத்தில் கொண்டு தேர்வு செய்யப்படுகின்றன. அவை, வெப்ப இயக்கவியல் அடிப்படையில் சாத்தியமானதா?, பிரித்தெடுக்கப்படவுள்ள இடைநிலை விளைபொருட்களுக்கான சோதிக்கத்தக்க ஆதாரங்கள் அல்லது வேதிவினையின் பண்பறி, அளவறிகின்ற இயல்புகள் ஆகியவையாகும். வினை வழிமுறையானது, ஒவ்வொரு வேதிவினையின் இடைநிலை விளைபொருட்கள், செயல்மிகு அணைவுச் சேர்க்கை விளைபொருள், நிலைமாறு நிலை மற்றும் பிணைப்புகள் எந்த வரிசையில் உடைக்கப்படுகின்றன?, எந்த வரிசையில் பிணைப்புகள் உருவாகின்றன என்பதையெல்லாம் விவரிக்கிறது. ஒரு முழுமையான வினை வழிமுறையானது, வினைபடு பொருட்கள் மற்றும் ஊக்கியாக பயன்படுத்தப்படும் பொருட்கள் ஏன் பயன்படுத்தப்படுகின்றன என்பதற்கான காரணத்தையும் விளக்குகிறது. மேலும், வினை வழிமுறையானது, வினைபடு பொருட்கள் மற்றும் வினைவிளைபொருட்களின் முப்பரிமாண வேதியியல், உருவாக்கப்பட்ட வினைவிளை பொருட்கள் மற்றும் ஒவ்வொன்றின் அளவு ஆகியவற்றையும் விவரிக்கிறது.
![Thumb image](http://upload.wikimedia.org/wikipedia/commons/f/f9/BromoethaneSN2reaction-small.png)
எதிர்மின்னி இரட்டையின் நகர்வை அம்புக்குறியின் மூலம் காட்டுவது வினை வழிமுறையை விளக்குவதாய் உள்ளது; உதாரணமாக, பென்சாயின் குறுக்க வினையின் வினை வழிமுறை பின்வரும் எடுத்துக்காட்டில் விளக்கப்பட்டுள்ளது.
ஒரு வினை வழிமுறையானது மூலக்கூறுகள் வினைபுரியும் வினையின் படிக்கான காரணத்தையும் விளக்க வேண்டும். பெரும்பாலும், ஒரு படிநிலையில் நடப்பது போல் தோன்றும் வினைகள் உண்மையில் பல படிநிலைகளைக் கொண்டுள்ளதாக உள்ளது.