வெற்றிடம்
பருப்பொருள் இல்லாத இடம் / From Wikipedia, the free encyclopedia
வெற்றிடம் (vacuum) என்பது எந்த ஒரு பொருளும் இல்லாத இடம் ஆகும். பொதுவாக இயற்பியல் ஆய்வகங்களில் காற்றை நீக்குவதன் மூலம் வெற்றிடம் உருவாக்கப்படுகிறது. பிரபஞ்ச வெளி நாம் நினைப்பது போல வெற்றிடம் அன்று. ஏனெனில் அங்கேயும் சிறு சிறு பொருட்துகள்கள் உள்ளன. வெற்றிடத்தில் ஒளி பயணிக்கும், ஒலியோ பயணிக்க இயலாது. ஏனெனில் நெட்டலையான ஒலி பரவ திட, திரவ, வாயு ஊடகமொன்று அவசியம் தேவை.
இயற்கை வெற்றிடத்தை வெறுக்கும் என்பது இயற்பியலில் அனைவருமறிந்த ஒன்றாகும். வெற்றிடத்தின் அரண்கள் ஊடுருவக் கூடியதாய் இருப்பின் அது பொருள்களால் நிரப்பப்படும். இத் தத்துவமே உறிஞ்சி உபகரணங்கள் (suction apparatus), தூய்மையாக்கிகள் (vaccum cleaner) ஆகியவற்றில் பயன்படுத்தப்படுகிறது.
குத்துமதிப்பாக, வளிமண்டல அழுத்தத்தில் இருந்து மிகமிகக் குறைவான அழுத்தம் கொண்ட ஒரு பகுதியை வெற்றிடம் என்று சொல்லலாம்.[1]. இயற்பியலாளர்கள் தங்களது உரைகளில் பல சமயங்களில் முற்றிலும் வெறுமையாய் இருக்கிற 'முழு' வெற்றிடம் பற்றிப் பேசுவார்கள். அதனையே பொதுவாக வெற்றிடம் என்பர். சோதனைக்கூடத்திலோ, விண்வெளியிலோ காணக்கூடிய அரைகுறை வெற்றிடத்தைப் 'பகுதி வெற்றிடம்' என்பார்கள். ஆனால், பொறியியலாளர்களும், பயன்பாட்டு இயற்பியலாளர்களும் வெற்றிடம் என்று குறிக்கும்போது, அது, வளிமண்டல அழுத்தத்தினும் குறைவான அழுத்தம் கொண்ட எந்தப் பகுதியையும் குறிக்கும்.[2]
பண்டைய கிரேக்க காலங்களிலிருந்து தத்துவ விவாதத்தின் தொடர்ச்சியான தலைப்பாக வெற்றிடம் என்பது இருந்து வந்துள்ளது. ஆனால், வெற்றிடம் என்பதைப் பற்றி 17 ஆம் நூற்றாண்டு வரை அனுபவப்பூர்வமாக ஆய்வு செய்யப்படவில்லை. எவாஞ்செலிசுடா டாரிசெல்லி என்பார் (Evangelista Torricelli) 1643 ஆம் ஆண்டில் முதன் முதலாக ஆய்வகத்தில் வெற்றிடத்தை ஏற்படுத்தினார். மேலும், வளிமண்டல அழுத்தம் தொடர்பான அவரது கோட்பாடுகள் விளைவாக பல சோதனை நுட்பங்கள் உருவாக்கப்பட்டன. ஒரு முனையில் பாதரசத்தால் நிரப்பப்பட்ட உயரமான கண்ணாடிக் கொள்கலன் பாதரசத்தைக் கொண்டுள்ள கண்ணாடி பாத்திரத்தில் கவிழ்க்கப்படும் போது உயரமான கண்ணாடிக் கொள்கலன் அல்லது குழாயில் பாதரசத்துக்கு மேலே ஏற்படுத்தப்படும் வெற்றிடமானது (டாரிசெல்லியின் வெற்றிடம்) உருவாக்கப்படுகிறது.[3]
20 ஆம் நூற்றாண்டில் வெற்றிட ஒளி விளக்குகள் மற்றும் வெற்றிட குழாய்கள் அறிமுகப்படுத்தப்பட்ட போது வெற்றிடமானது ஒரு மதிப்பு மிக்க தொழிற்துறை கருவியாக மாறியது. மேலும், வெற்றிடத்தை உருவாக்கும் தொழில்நுட்பங்களின் விரிவான வரிசையும் கிடைக்கத் தொடங்கின. மனித விண்வெளிப் பயணத்தின் சமீபத்திய வளர்ச்சி மனித ஆரோக்கியத்தின் மீது வெற்றிடத்தால் ஏற்படும் தாக்கம் மற்றும் பொதுவான வாழ்க்கை வடிவங்களில் ஆர்வத்தை அதிகரித்துள்ளது.