மின்கா
From Wikipedia, the free encyclopedia
மின்கா என்பது, சப்பானிய மொழியில், ஏதாவதொரு மரபுவழிச் சப்பானியக் கட்டிடப் பாணியில் கட்டப்பட்ட நாட்டார் வீடுகளைக் குறிக்கும். மின்கா, சப்பானியச் சமூகத்தின் நான்கு பிரிவுகளுள் அடங்கும் விவசாயிகள், கைவினைஞர், வணிகர் ஆகிய சமுராய் அல்லாத சாதிப் பிரிவினருக்கான வீடுகளையே முன்னர் குறித்தது. ஆனால், தற்போது இச்சொல் இந்தப் பொருளில் பயன்படுவதில்லை. தற்காலத்தில், மரபுவழிச் சப்பானியப் பாணியில் அமைந்தனவும், பொருத்தமான காலப்பகுதியைச் சேர்ந்தனவுமான வீடுகள் எல்லாமே மின்கா என்னும் சொல்லால் குறிக்கப்படுகின்றன.
மின்காக்களை, அவற்றின் அடிப்படைக் கட்டுமான அமைப்பு, கூரையமைப்பு, கூரை வடிவம், என்பவற்றைக் கொண்டு அடையாளப்படுத்துகின்றனர். மிக நீண்ட காலமாக வளர்ச்சியடைந்து வந்த மின்காக்களின் தனித்துவமான பாணிகள் ஏடோ காலப் பகுதியில் உருவாகின.