![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/4/47/Excerpt_from_CDC_2003_Table_1.pdf/page1-640px-Excerpt_from_CDC_2003_Table_1.pdf.jpg&w=640&q=50)
நிதி இடர்க் கணிப்பியல்
காப்பீடு மற்றும் நிதித் தொழில்களில் இடரை மதிப்பிடுவதற்கு கணித மற்றும் புள்ளியியல் முறைகளைப் / From Wikipedia, the free encyclopedia
நிதி இடர்க் கணிப்பியல் (Actuarial Science) என்பது காப்பீடு, ஓய்வூதியம், நிதியியல், முதலீடு மற்றும் பிற தொழில் துறைகளிலும் வாழ்க்கைத் தொழில்களிலும் அபாய நேர்வை மதிப்பிடுவதற்கு கணிதம், புள்ளியியல் ஆகிய முறைகளைப் பயன்படுத்தும் கல்விமுறையே ஆகும். பொத்தாம்பொதுவாக, நிதி இடர்க் கணிப்பாளர்களால் நிச்சயமற்ற தன்மை மற்றும் மனித ஆயுட்காலம் குறித்த மாதிரி விஷயங்களுக்கு கடுமையான கணிதம் பயன்படுத்தப்படுகிறது.
![Thumb image](http://upload.wikimedia.org/wikipedia/commons/thumb/4/47/Excerpt_from_CDC_2003_Table_1.pdf/page1-640px-Excerpt_from_CDC_2003_Table_1.pdf.jpg)
நிதி இடர்க் கணிப்பாளர்கள் இந்த துறையில் பயிற்சி பெற்ற வல்லுநர்கள் ஆவர். பல நாடுகளில், நிகழ்தகவு மற்றும் முன்கணிப்பு பகுப்பாய்வு போன்ற துறைகளில் கவனம் செலுத்தும் தொடர்ச்சியானதும், கடுமையானதுமான தொழில்முறை தேர்வுகளில் தேர்ச்சி பெறுவதன் மூலம் நிதி இடர்க் கணிப்பாளர்கள் தங்கள் திறமையை நிரூபிக்க வேண்டியுள்ளது.[1]
நிதி இடர்க் கணிப்பியல் கணிதம், நிகழ்தகவு கோட்பாடு, புள்ளியியல், நிதி, பொருளாதாரம், நிதிக் கணக்கியல் மற்றும் கணினி அறிவியல் உட்பட பல ஒன்றோடொன்று தொடர்புடைய பாடங்களை உள்ளடக்கியது. வரலாற்று ரீதியாக, அட்டவணைகள் மற்றும் பிரீமியங்களின் கட்டுமானத்தில் நிதி இடர்க் கணிப்பியல் நிர்ணயிக்கும் மாதிரிகளைப் பயன்படுத்தியது. அதிவேக கணினிகளின் பெருக்கம் மற்றும் நவீன நிதிக் கோட்பாட்டுடன் வாய்ப்பியல் நிகழ்முறை மாதிரிகள் ஒன்றிணைந்ததன் காரணமாக 1980 களில் இருந்து இந்த அறிவியல் புரட்சிகரமான மாற்றங்களைச் சந்தித்துள்ளது[1].
பல பல்கலைக்கழகங்கள் நிதி இடர்க் கணிப்பியலில் இளங்கலை மற்றும் முதுகலை பட்டப்படிப்புகளை வழங்குகின்றன. 2010-இல், வேலை தேடுதல் இணையதளமான கேரீர்காஸ்ட் (CareerCast) வெளியிட்ட ஒரு ஆய்வில், அமெரிக்காவில் #1 வேலையாக நிதி இடர்க் கணிப்பு தரவரிசைப் படுத்தப்பட்டது[2]. இந்த ஆய்வு வேலைகளை தரவரிசைப்படுத்த சுற்றுச்சூழல், வருமானம், வேலைவாய்ப்புக் கண்ணோட்டம், உடல் தேவைகள் மற்றும் மன அழுத்தம் ஆகிய ஐந்து முக்கிய அளவுகோல்களைப் பயன்படுத்தியது. 2006-ஆம் ஆண்டில் யு.எஸ். நியூஸ் & வேர்ல்ட் ரிப்போர்ட்டின் இதேபோன்ற ஆய்வில், எதிர்காலத்தில் அதிக தேவை இருக்கும் என்று எதிர்பார்க்கும் 25 சிறந்த தொழில்களில் நிதி இடர்க் கணிப்பாளர்களும் அடங்கும்[3].