![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/3/3f/Viking_5C_rocketengine.jpg/640px-Viking_5C_rocketengine.jpg&w=640&q=50)
ஏவூர்திப் பொறி
From Wikipedia, the free encyclopedia
ஏவூர்திப் பொறி (Rocket Engine) என்பது தன்னிடம் தேக்கி வைக்கப்பட்டுள்ள ஏவூர்திப்பொறி எரிபொருட்களைப் பயன்படுத்தி அதிவேக உந்துகைத் தாரைகளை உண்டுபண்ணும் ஒருவகை தாரைப் பொறி[1][2] ஆகும். இவை நியூட்டனின் மூன்றாம் விதியின்படி செயல்பட்டு உந்துவிசையை ஏற்படுத்தும் எதிர்வினைப் பொறிகளாகும். பெரும்பாலான ஏவூர்திப் பொறிகள் உள் எரி பொறிகள் ஆகும், ஆனால், சில எரியா வகைப் பொறிகளும் உண்டு. இவ்வகைப் பொறிகளால் உந்தப்படும், செயல்படும் வாகனங்கள்/ஊர்திகள் ஏவூர்திகள் எனப்படும். இவ்வகைப் பொறிகளின் இயக்கத்துக்குத் தேவையான அனைத்துப் பொருட்களும் இவற்றுக்குள்ளேயே இருப்பதால், அதாவது வெளியிலிருந்து எவ்வகை எரிபொருளோ காற்றோ தேவைப்படாததால், இவற்றை விண்வெளியின் வெற்றிடத்திலும் பயன்படுத்த இயலும்; ஆகையால், இவை விண்கலங்கள் மற்றும் எறிகணைகளில் பயன்படுத்தப்படுகின்றன.
![Thumb image](http://upload.wikimedia.org/wikipedia/commons/thumb/3/3f/Viking_5C_rocketengine.jpg/640px-Viking_5C_rocketengine.jpg)
மற்றவகை தாரைப் பொறிகளுடன் ஒப்பிடுகையில் ஏவூர்திப் பொறிகள் மிக அதிக உந்துவிசையை ஏற்படுத்துகின்றன; ஆனால், மற்றவற்றைவிட மிகக் குறைந்த பயன்திறன் கொண்டவையாக இருக்கின்றன (இவை மிகக் குறைவான கணத்தாக்கு எண் (Specific Impulse) கொண்டிருக்கின்றன). தூம்புவாயில் வெளித்தள்ளப்படும் வேதிவிளைபொருட்களின் மூலக்கூறு எடை குறைவாக இருக்கும்போது ஏவூர்திப் பொறிகளின் உந்துவிசை மிக அதிகமாக இருக்கும்; ஆக, ஐதரசன் வாயுவை வெளித்தள்ளுவதே மிகச் சிறந்த நடைமுறையாக இருக்கும், ஆனால், சற்றே மூலக்கூறு எடை அதிகமான பல வேதிப் பொருட்களின் கலவையாகவே வெளியேற்றப்படும் தாரை இருக்கிறது.
ஏவூர்திகளின் திசைவேகம் அதிகமாகும்போது ஏவூர்திப் பொறிகளின் பயன் திறனும் அதிகரிக்கிறது. ஏவூர்திப் பொறிகள் இயங்க வளிமண்டலம் தேவையில்லாத காரணத்தால் கடல் மட்டத்திலிருந்து மிக உயரத்திலும் விண்வெளியிலும் இவை பயன்படுத்தப்படுகின்றன.