உடல்மொழி
From Wikipedia, the free encyclopedia
உடல் மொழி (Body language) என்பது தகவல் பரிமாற்றத்தில் வார்த்தைகளுக்கு மாறாக உடல் நடத்தைகளான முகபாவங்கள், உடல் தோரணை, சைகைகள், கண் அசைவு, தொடுதல், இடத்தைப் பயன்படுத்துதல் போன்ற உடல் இயக்கங்கள் மூலம் தகவலை வெளிப்படுத்துதல் அல்லது தெரிவித்தலைக் குறிக்கும். உடல் மொழி என்ற சொல் பொதுவாக மக்கள் மத்தியில் பயன்படுத்தப்படுகிறது.[1] ஆனால் இம்முறை ஒருவேளை விலங்குகளிலும் பயன்படுத்தப்படலாம். உடல் மொழி பற்றிய ஆய்வு உடல் மொழியியல் என்று அழைக்கப்படுகிறது.[2]
உடல் மொழி என்பது தகவல்தொடர்பின் ஒரு முக்கிய பகுதியாக இருந்தாலும், பெரும்பாலானவை அனிச்சை செயலாகவே நடக்கும்.
உடல் மொழி என்பதை சைகை மொழியுடன் இணைத்துக் குழப்பமடையக்கூடாது. சைகை மொழிகள் என்பவை உண்மையில் மொழிகளேயாகும். அவை அவற்றின் சொந்த சிக்கலான இலக்கண அமைப்புகளைக் கொண்டுள்ளன. அனைத்து மொழிகளிலும் இருப்பதாகக் கருதப்படும் அடிப்படை பண்புகளை இம்மொழிகளாலும் வெளிப்படுத்த முடியும்.[3][4] மறுபுறத்தில் உடல் மொழி என்பது இலக்கண அமைப்பைக் கொண்டிருக்கவில்லை. அனைத்து மொழிகளிலும் இருப்பதாகக் கருதப்படும் அடிப்படை பண்புகளை உடல் மொழியால் வெளிப்படுத்த இயலாது. பரந்த அளவில் இது விளக்கப்பட வேண்டும். எனவே இது ஒரு மொழி அல்ல என்றாலும் நடைமுறையில் உடல் மொழி என்று அழைக்கப்படுகிறது.[5]
ஒவ்வொரு சமூகத்திலும் குறிப்பிட்ட நடத்தைக்கென்று ஒப்புக்கொள்ளப்பட்ட சில விளக்கங்கள் உள்ளன. இவ்விளக்கங்கள் நாட்டிற்கு நாடு அல்லது கலாச்சாரத்திற்கு கலாச்சாரம் மாறுபடலாம். இந்த நோக்கில் உடல் மொழி என்பது உலகளாவியதா என்ற சர்ச்சையும் உள்ளது. சொற்கள் அல்லாத தகவல்தொடர்புகளின் துணைக்குழுவாக உடல் மொழி செயல்படுகிறது. சமூகத்தில் தொடர்பாடல்களில் வாய்மொழி தொடர்பை உடல்மொழி நிறைவு செய்கிறது. உண்மையில், தனிப்பட்ட தொடர்புகளின் போது அனுப்பப்படும் பெரும்பாலான தகவல்களுக்கு சொற்கள் அல்லாத உடல் மொழித் தகவல்தொடர்பே உதவுகிறது என்று சில ஆராய்ச்சியாளர்கள் முடிவு செய்கின்றனர்.[6] உடல் மொழி தெளிவற்றதாக இருந்தாலும் இரண்டு நபர்களுக்கிடையேயான உறவை நிறுவ உதவுகிறது, தொடர்புகளை ஒழுங்குபடுத்தவும் செய்கிறது.