ஆட்டக் கடிகாரம்
From Wikipedia, the free encyclopedia
ஆட்டக் கடிகாரம் என்பது இருவர், ஒரே நேரத்தில் விளையாடும் ஆட்டங்களில் பயன்படுத்தப்படும் ஒரு சாதனம். இதில் இரண்டு கடிகாரங்களும், அவற்றின் மேல் இரண்டு பொத்தான்களும் இருக்கும். ஒரு கடிகாரத்தின் பொத்தானை அழுத்தினால் அக்கடிகாரம் நிற்கும், அடுத்த கடிகாரம் ஓடும். ஆகவே இரண்டு கடிகாரங்களும் ஒரே நேரத்தில் ஓடாது. ஆட்டாக்காரர்கள் ஒரு நகர்த்தலுக்கு எடுக்கும் நேரத்தைக் கணிக்க இது உதவுவதுடன், ஒரு ஆட்டக்காரர் தன் நகர்த்தல் ஒன்றுக்கு அதிக நேரம் எடுத்து ஆட்டத்தை தாமதப்படுத்தாமல் இருக்கவும் உதவுகிறது.
ஆட்டக் கடிகாரங்கள் முதலில், பெரும்பாலும் சதுரங்க போட்டிகளிலேயே பயன்படுத்தப்பட்டதால், இது அடிக்கடி சதுரங்கக் கடிகாரம் எனவும் அழைக்கப்படுகிறது. பின்னர் இதன் பயன்பாடு சொல்லாக்க ஆட்டம், சோகி, வெய்ச்சி மற்றும் பொதுவாக இருவர் ஆடும் ஆட்டங்களுக்கும், வேறு சில பலகை விளையாட்டுக்களும் பரவியது. முதலில் நடுவர் அனைத்து கடிகாரங்களையும் ஒரு பக்கமாக, இலகுவாக அனைத்தையும் அவதானிக்கும் வகையில் அடுக்குவார். இது இறுதி நேரங்களில் கவனம் தேவைப்படும் ஆட்டங்களை வகைப்படுத்த உதவும். 1883 ஆம் ஆண்டு இலண்டனில் நடந்த சதுரங்கப் போட்டித் தொடரில் முதன் முதலாக ஆட்டக்கடிகாரங்கள் பயன்படுத்தப்பட்டன..[1]