அதிரடித் திரைப்படம்
From Wikipedia, the free encyclopedia
அதிரடித் திரைப்படம் அல்லது சண்டைத் திரைப்படம் (Action Film) திரைப்படம் மற்றும் நாடகத் தொடர்களில் உள்ள ஒரு வகையாகும். ஒரு அதிரடித் திரைப்படம் என்பது ஒன்று அல்லது அதற்கு மேற்பட்ட கதாநாயகர்களைக் கொண்டு, அவர்களின் உடல் வலிமையையும், சண்டைக் கலையில் உள்ள திறன்களையும், நீட்டிக்கப்பட்ட சண்டைக் காட்சிகள் மற்றும் பரபரப்பான சவால்களையும், துரத்தல் காட்சிகள் முதலியவை கொண்டு அமைந்துள்ள ஒரு பட வகையாகும். ஒரு தீயவன் (வில்லன்) அல்லது ஒரு தீய குழுவை, கதாநாயகர்கள் உயிருக்கு ஆபத்தான சூழ்நிலையில், வன்முறை மூலம் போராடி இறுதியில் வெற்றி அடைவதாக காட்டப்படும். நம்புவதற்கு அரிய சாகசங்களை அவர்கள் செய்வதாகவும் காட்டப்படும். ஆயுதங்கள், வன்முறை நிறைந்த காட்சிகள் நிறைந்து காணப்பட்டாலும், அதிரடித் திரைப்படங்கள் அனைத்து தரப்பினரையும் ஈர்க்கின்றவை என்றும் உறுதியாக வருவாய் ஈட்டக் கூடியவை என்றும் நம்பப்படுகின்றது.
உலகின் முதலாவது அதிரடித் திரைப்படம் 1903 ஆம் ஆண்டில் வெளிவந்த "மிகப்பெரிய புகையிரதக் கொள்ளை" (The Great Train Robbery) எனும் திரைப்படமே என வரலாற்றாளர்கள் கருதுகின்றனர்.[1][2] இந்த வகை திரில்லர், சாகசம் மற்றும் உளவுபார்க்கும் திரைப்பட வகைகளுடன் நெருக்கமாக தொடர்புடையது.