Sustertaxa

Sustertaxa (Sg.:Sustertaxon) - n internationoal bruukboar Fäkwoud is "Adelphotaxa" - sunt two Taxa, doo mäd dät jeewielich uur Taxon genetisk naier früünd sunt as mäd aal uur Taxa, inne Phylogenetiske Systematik betjuudt dät, dät doo bee in n eersten Groad fonne phylogenetiske Ferwandtskup touhoopestounde, un touhoope n monophyletisk Superspezifisk Taxon sunt. Dät betjudt nit, dät joo ook Twillingstaxa sunt - dät hat, dät joo ook n äänelken Phänotyp hääbe - ook wan dät oafte so is. So sjucht toun Biespiel die Sleek Elephas - däälich rakt dät deer bloot noch dän Asiatisken Elefant - so äänelk uut as die Sleek Loxodonta - dät is die Sleek fon doo afrikoanske Elefante. Man owwol disse Taxa n äänelken Phänotyp hääbe, is die Sleek Elephas mäd dän Sleek Mammuthus - doo uutsturwene Mammute - genetisk naier früünd as mäd dän Sleek Loxodonta. Die Sleek Elephas is also dät Sustertaxon fon dän Sleek Mammuthus.

• 
  N Wooldelefant (Loxodonta cyclotis) mäd sin Bäiden as Biespiel foar dän Sleek Loxodonta.
• 
  Juu Unneroard Elephas maximus bengalensis fon dän Asiatisken Elefant (Elephas maximus) as Biespiel foar dän Sleek Elephas.
• 
  Rekonstruktion fon dät Wullmammut (Mammuthus primigenius) as Biespiel foar doo Mammute (Mammuthus)

Sustertaxa inne Phylogenetiske Systematik

Hier n Kladogramm mäd Variablen, uum dät beeter wiese tou konnen. B un C sunt Sustertaxa af Adelphotaxa. Joo stounde in dän eersten Groad fonne Phylogenetiske Ferwantskup touhoope, deeruum dät joo bee as eensige Oarde fonne Stamoard d oustamme. A, B, C un doo Stamoarde e un d sunt, deeruum, dät joo alle fonne Stamoard e oustamme, n monophyletisk Taxon. B, C un juu Stamoard d sunt touhoope n litjer monophyletisk Taxon. Düt litjer Taxon stoant nu mäd A in n twäiden Groad fonne Phylogenetiske Systematik touhoope. Gnau so kon me oaber toun Biespil uk kweede, dät B un A in n twäiden Groad fonne Phylogenetiske Systematik touhoopestounde, deeruum dät B tou dät litjere monophyletiske Taxon heert.

                                A      B       C
                                 \      \     /
                                  \      \   /
                                   \      \ /
                                    \      d
                                     \    /
                                      \  /
Deer gungt dät uk fääre, man dät       \/
is uunwichtich.                \       e
                                \     /
                                 \   /
                                  \ /
                                   f
                                  /
                                 / Juu Linie fonne Stamoard "f". Deer gungt dät noch fääre
                                   deel, man dät is uk uunwichtich.

Sjuch uk

• Twillingstaxa

Wällen

• Peter Ax: Das Phylogenetische System; Gustav Fischer Verlag; ISBN 3-437-30450-X