Sipitire

Pachinyorwa chino mazwi anoti sipitire kana musipitire ari kuturikira chinonzi constant kuEnglish - pahuwandu konzi masipitire (constants).

Izwi rokuti kusipitika (to stand still) rinoreva kumira panzvimbo imwe pasina kufamba, kusuduruka kana kupfekenyeka. Vamwe vanoti kudzororoka.

KuEnglish, constant inodudzirwa ichinzi a quantity or parameter that does not change its value whatever the value of the variables, under a given set of conditions.

Kurerutsa Mutauro

• The speed of light in a vacuum is constant. Spidhi yechiedza muvhakiyumu sipitire.
• Constant of proportionality. Sipitire reRupandavaro.
• Avogadro's Constant. Sipitire raAvogadro.
• The plane's speed remained constant. Spidhi yendege yanga yakasipitika.

Mamwe Mazwi

Pano chinangwa ndechekuumba mutauro nemazwi matsva, saka mazwi achakawanda anozama kuturikira chinonzi constant.

• Kukokonerwa (being fixed in place) rinoreva chinhu chakasimbiswa chiri panzvimbo imwechete chisingatsukunyuke. Hoko inokokonerwa pasi ichipa pane muganhu unoda kutarwa. Bango rinokokonerwa pamucheto pemusha une mwene wayo.
• Kusomeka (to be fixed in, stick in) zvinoreva kukokonerwa zvakare, kureva kuti hachisikufamba kubva pachiri, chakadzika midzi ipapo.
• Kusomekera (to fix in, stick in). Shoko rokuti constant rinokwanisa kuturikirwa zvichibva pakusomeka, tichiti, musomekerwa, misomekerwa kana yakasomekerwa.
• Rambirapo zvichireva Kati chiri kurehwa hachishanduke chimiro, hukuru, huwandu, spidhi, hurefu kana huremu.

Mitauro yeAfrika

• Herero inoti outakame (constancy) kureva chinogara chiripo chisingashanduke kana kuguma.
• Herero inoti -takame (constant; faithful) kureva chinogara chiripo chisingashanduke kana kuguma.
• Chewa neBaila vanoti kusalala (flatness, even - of road) kureva musandarara. Mamwe mazwi: salala (to be straight, to be smooth, trim, pretty - of anything).
• Tem vanoti sáárá (equal, even, smooth) kureva kuenzana. Mamwe mazwi: sáárátɩ (equality; parity, evenness, straight).