Tulumeu
From Wikipedia, the free encyclopedia
Claudiu Tulumeu ('n grecu Klaudios Ptolemaios, 'n latinu Claudius Ptolomaeus; 85 ca. -165 ca., notu simpricimenti comu Tulumeu, fu n'astronomu grecu d'èbbica mpiriali ca prubbabbirmenti campau e travagghiau a Alissandria d'Egittu. Cunziddiratu unu di li patri dâ geografia, fu auturi di dui mpurtanti òpiri scintifichi, la principali dî quali è lu trattatu astronòmicu notu comu Almaggestu ('n grecu "Hè Megalè Syntaxis", "Lu granni trattatu"). Comu pi larga parti dâ scienza e dâ filusufìa greca clàssica, pirvinni ê nostri jorna attraversu manuscritti arabbi ca foru traduciuti 'n latinu di Girardu di Crimona sulu ntô sèculu XII.
'N stu travagghiu, una di l'òpiri cchiù nfruenti di l'antichitati, Tulumeu cugghìu la canuscenza astronòmica di lu munnu grecu e babbilunisi, basànnusi suprattuttu supra lu travagghiu svulciutu tri sèculi prima d' Ipparcu. Tulumeu furmulau nu mudellu geocintricu (ca d'iddu va a pigghiari lu nomu, tulimaicu, appuntu) dû sistema sulari ca rimanìu rifirimentu pi tuttu lu munnu uccidintali (ma macari arabbu e innianu) finu a ca nun fu sustituutu di lu sistema sulari eliocintricu di Cupirnicu.