![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/b/bc/Paul_of_Tarsus.jpg/640px-Paul_of_Tarsus.jpg&w=640&q=50)
Pàulu di Tarsu
From Wikipedia, the free encyclopedia
Pàulu di Tarsu, canusciutu macari comu San Pàulu, nascìu a Tarsu ntra lu 5 e lu 10 d.C., e murìu màrtiri a Roma ntô 67. Fu n'apòstulu chiamatu ô sacru sirvizziu na para d'anni doppu ca murìu Gesù Cristu, e fù lu principali missiunàriu dû vangelu. Accuminciàu li sò viaggi missiunàrî a partiri dô 48 o 49 d.C., e viaggiàu prima ntâ l'Asia Minuri (ca è la Turchia d'oi), appoi passàu lu strittu e sbarcàu nta lu solu auropèu agghicannu a Filippi, a Tissalonica, e appoi nzinu a Corintu. Turnatu a Jirusalemmi vinni arristatu e purtatu a Cisarea unni stesi dui anni carzaratu. Addumannàu appoi d'essiri judicatu direttamenti di lu mpiraturi rumanu (s'appillàu a Cèsari). Ntô 60 d.C. fu nvarcatu supra na navi rumana cu na scorta di surdati; duranti lu viaggiu attraversu lu Mari Meditirraniu, na timpesta fici naufragari la navi, ma tutti si sarvaru pigghiannu terra a Malta, unni, secunnu li Atti di l'Apostuli, fu auturi di nu miràculu. Appoi fici tappa a Saraùsa, ntâ Sicilia sud-urientali, e poi a Riggiu Calabbria prima d'acchianarasinni ammeri lu cuntinenti nzinu a Puzzuoli. Cuntribbuìu assai â diffusioni nizziali dû cristianèsimu, e diversi loca, lu cui nomu si pò rifiriri a San Paulu, tistimònianu lu sò passaggiu oppuru di l'òpira di li sò cullaburaturi fideli.
![Thumb image](http://upload.wikimedia.org/wikipedia/commons/thumb/b/bc/Paul_of_Tarsus.jpg/320px-Paul_of_Tarsus.jpg)
San Pàulu assennu citatinu rumanu appi lu privileggiu di na morti lesta; ci vinni tagghiata la testa nta la Via Ostiensi a Roma. Nta la zzona Ostiensi oi c'è na granni basìlica a iddu didicata.