Palermu: Lu tribbunali di Palermu dicisi nu maxi risarcimentu di 3 miliuna e menzu di euru â famigghia di Paulu Borsellinu ammazzatu dâ mafia ntô 1992. Li sordi nèsciunu dû funnu di rutazziuni pî familiari dî vìttimi dâ mafia, alimintatu dî beni sequestrati.
Nàpuli: La prucura di Santa Maria Capua Vetere, nnâ n'inchiesta supra la prisunta gistioni llecita dû puteri 'n Campania, ndagau lu ministru talianu dâ Giustizzia Climenti Mastella, mentri ca sò muggheri, Sandra Lonardo, prisidenti dû Cunsigghiu riggiunali dâ Campania, è a l'arresti dumiciliari. Àutri amministraturi di l'Udeur, cu àutri urdinanzi di custodia cautilari, sunnu cuinvuggiuti ntâ vicenna.
Palermu: Sarvaturi Cuffaro, prisidenti dâ Riggiuni Siciliana, hà statu cunnannatu a cinc'anni di càrciri pri favuriggiamentu sèmprici e rivilazzioni di sicretu d'uffìciu, mentri ca l'aggravanti dû favuriggiamentu a Cosa Nostra cascau. Li jùdici, cumunqui, hannu ntirdettu Cuffaro dê pùbbrichi uffici pri tutta la durata dâ pena.
Girusalemmi: L'autoritati militari sraeliani ci pruibberu ê càmii càrichi di merci pâ populazzioni di Gaza di tràsiri ntâ "Striscia" attraversu lu postu di fruntera di Kerem Shalom, ô cunfini tra Israeli, l'Eggittu e la Striscia. Già di venniridìa passatu, Israeli avìa fattu nu bloccu tutali nnê vàlichi di fruntera e senza cchiù manciari e mancu carburanti (mancannu chistu Gaza è ô scuru, macari ntê spitali), la populazzioni è aridduciuta malamenti. Gazza è sutta assediu e lu munnu talìa, mutu.
Melbourne: Roger Federer, nùmmuru 1 dî classifichi ATP di tennis, fu battutu di Djokovic, nu tinnista serbu di 20 anni, ntâ semifinali di l'Australian Open.