Catania: Nu futògrafu tudiscu ca s'avìa pirdutu supr'a l'Etnasabbatudìa passatu, vinni attruvatu mortu dê succurrituri ntâ zona Hornitos dû vurcanu, a 2.780 metri. Si chiamava Thomas Reichart e avìa 32 anni.
Bangkok: Li manifistanti luvaru lu bloccu all'airoportu, 'n sèquitu â destituzzioni dû cuntruversu primu ministru. Li migghiara di turisti si ni ponnu ora turnari â casa.
Stròmbuli: Aieri a sira lu vulcanu trunau, facennu trimari li vitra dî paisi. Lu celu si tincìu di russu e tanticchia di petri caderu dâ sciara dû focu. Lu centru lucali di vulcanuluggìa dissi chi fu n'attivitati chi rientra ntâ nurmalitati.
Irlanda: quantità significativi di diossina foru truvati ntâ carni di maiali irlannisa, pruvucannu lu ritiru di prudutti a basi di carni di maiali irlannisa nti tutta l'Europa.
Grecia: Ancora aoggi, a tri jorna di l'ammazzatina di un carusu di 15 anni fatta dâ polizzìa, li rivorti ntâ Grecia non s'hann'a stimpiratu. Nti sta jurnata, unni ci sunnu li funirali dû carusu, lu scantu è chiddu ca ci ponnu èssiri àutri viulenzi.
Etna: Pô malu tempu, ottu boy scouts arristaru bluccati supra a l'Èttina. La nivi àuta, lu jelu e la negghia cci cunsighiaru d'ariparàrisi nta nu rifuggiu, saputu sèntiri Timpa Russa, a 2.093 metri ntô ciancu nord dû vurcanu. A sta matina, na vota ca ci avìanu finuti li cosi di manciari, addumannaru aiutu e di Niculosi parteru li succurrituri ca attruvaru tutti li carusi sani e sarvi.
Iraq: Ô prisidenti miricanuGeorge W. Bush, ca avìa iutu a Bagdad pri dàricci un salutu ê surdati miricani, ntô mentri di na cunfirenza stampa fatta nzemi ô premier di l'Iraq, Nuri al Maliki, nu jrnalista irachenu ci lassau cùrriri li sò scarpi, ma senza arinèsciri a nzittàrilu picchì chiddu fu lestu a scanziàrili. Lu jurnalista, pri sùbbitu abbluccatu dî forzi di l'òrdini, era assittatu ntâ terza fila e mentri li dui òmini pulìtichi si stringèvanu li manu d'avanti a la telivisioni, si susìu e cci abbanniau: «chistu è lu tò vasuni d'addiu, cani» e ntô mentri, una appressu a l'àutra, cci tirau li scarpi ô prisidenti miricanu.
Pariggi: Robbertu Alagna, unu cantanti lìrichi cchiù apprizzati a liveddu ntirnazziunali, pubbricau nu CD, Sicilien, di canzuni 'n sicilianu chi agghicau ô secunnu postu dâ classifica dî disca cchiù vinnuti n Francia.
Palermu: Stamatina li carrabinera stannu purtannu a termini na maxi upirazzioni contra la mafia ntâ pruvincia di Palermu chi purtau a firmari 99 pirsuni. Secunnu l'inquirenti diversi famigghi mafiusi vulèvanu ricustituiri la cùpula mafiusa.
Iraq: Nu sciìccu àrabbu saudita, Hassan Mohammed Makafah, riccu pussidenti, pri macari una sula di li scarpi ittati cuntr'a lu prisidenti miricanuBush duminicadìa passata, è dispunìbbili a pajari nzinu a deci miliuna di dòllari.
Grecia: Ntô pumiriggiu d'aoggi, ntô centru di Ateni, unni s'avìanu arricugghiutu quarchi 3.000 studenti e prufissuri, ci foru àutri scontri ntra la polizzìa e li manifistanti. Di la parti dê manifistanti si ittaru bummi molotov e petri contr'â polizzia e chista arrispunnìu chê lacrimòggini.
Gaza: Doppu la ruttura dâ tregua dû Hamas, li cummattimenti tra palistinisi e israiliani ripigghiaru di ntinsità. Li bummi israiliani ficiru chiossai di 300 morti ntâ striscia di Gaza. Si cunta puru quarchi mortu israilianu pî razzi palistinisi.