Ardesia
From Wikipedia, the free encyclopedia
L’ardesia (ditta midemma petra di Lavagna o, nta arcuni parrati alpini, piöda) è na varitati di roccia metamòrfica d'urìggini sidimintaria, diffusa n Italia dû Nord n particulari ntâ Liguria, ntô Piemunti e ntâ Lummardìa.
Fruttu dâ sidimentazzioni prugrissiva d'un limu assai finu duvutu â frammintazzioni di rilievi antichi, l’ardesia è na roccia classificata comu tènnira o semi-dura. Si tratta di na varitati particulari di scisti carcàriu-argillusi ca si ponnu divìdiri facirmenti n lastri suttili, chiani, leggi, mpirmiàbbili e risistenti a l'aggenti attimusfèrici.
È na petra assai carcarìfica e cumpatta, ca ci havi lu culuri dû chiummu o tanticchia nìura e ca si pò travagghiari facirmenti. L’ardesia tenni a schiaràrisi dû mumentu dâ strazzioni nzinu a aviri na pigmintazzioni griggiu chiara, la tunalitati scura essennu duvuta a risìdui di carboniu ca vannu nta l'aria quannu sunnu a cuntattu cu ussìgginu, umititati e radiazzioni ultraviuletti. Pò èssiri mpigata nta vari sigmenti artiggianali e nnustriali tantu di l’architittura e di l’edilizzia (pâ rializzazzioni di tetti, abbalatati, o scaluna) quantu n arti ntô design e pi l'uggetti d'usu cutidianu.