From Wikipedia, the free encyclopedia
La palora anarchìa diriva dû grecu αναρχία, (anarchia), ca significa 'senza cuvirnanti' (an- significa 'senza', la radica arch- pò essiri traduciuta cu 'cuvernu o dôminiu').
L'anarchìa è na forma di sucitati unni tinninziarmenti s'annullissi quarsiasi forma d'auturitati mposta; l'anarchici cridinu ntâ capacitati naturali di l'omu d'auturiulàrisi 'n sucitati. L'esistenza di rèuli e cumminzioni suciali nta l'anarchia nun è esclusa a priori a pattu ca li rèuli e li cumminzioni vennu libbiramenti ditirminati e accittati dâ cumunitati ntirissata e nun ripprisentinu na mpusizzioni dirivanti dû majuri putiri d'arcuni rispettu a l'àutri.
Sibbeni ntâ storia di l'omu esisteru nummarusi rializzazzioni di sucitati e urganizzazzioni basati supra principi anarchici, lu Cumuni di Pariggi dû 1871 fu forsi lu primu tintativu di sucitati anarchica a accanzàrisi risunanza glubbali; s'arricorda lu cummentu di Michail Bakunin, unu dî granni pinzatura sturici di l'anarchia. Autri rializzazioni cuncreti e vasti dî principi anarchici ntâ sucitati si ritrovanu duranti la verra civili 'n Spagna, duranti la quali li travagghiatura, spissu attraversu l'urganizzazzioni anarcosinnacalisti comu la CNT 'n Catalugna e Araguna, dettiru prova d'autuggistioni dî trasporti pubblici e dei l'azzienni pruduttivi sia gnustriali ca agricoli: attraversu l'assimblei di basi foru rializzati cullittivizzazzioni dî terri cunfiscati ê latifunnisti e, 'n arcuni casi, fu addirittura abbuluta la prupritati privata; stu capitulu si nchiudiu a causa di na scunfitta militari, nfatti oltri a cummattiri li nazziunalisti di Franciscu Francu (appujatu di l'Italia Fascista e dâ Girmania Nazzista), l'anarchici happiru a vardàrisi videmma dî cumunisti, ch'eranu appujati di Stalin cu l'espressu divetu d'armari macàri l'anarchici. Fu però tantu mpurtanti videmma l'espirienza dâ Makhnovicina, zoè l'Ucraina nsorta sutta la guida dû ginirali cuntadinu/viddanu Nestor Ivanovich Makhno e la risistenza dâ citati russa di Kronstadt. Ntrammi st'espirienzi vinniru cancillati dâ nurmalizzazzioni suvietica attraversu l'utilizzu di l'Armata Russa cumannata dû Ginirali Lev Trockij.
Lu tèrmini anarchìa veni macàri mprupiamenti utilizzatu pi suttaliniari "cavusu/causu" (caos) e cunfusioni, mentri lu pinzeru anarchicu godi di nummarusi estimatura, comu Noam Chomsky, notu espunenti dû MIT.
Lu principiu funnamintali ca sta â basi dû pinzeru anarchicu si funna supra n'idiali di libbirtati estrema ca pricluda quarsiasi forma di cuvernu ("Tutti li partiti senza ccizzioni, ntâ misura 'n cui si pruponnu la cunquista dû putiri, sunnu varitati di l'assulutismu", "Lu cuvernu supra l'omu di parti di l'omu è la schiavituti", "Cuegghiè mi metti li manu addossu/ncoddu pi cuvirnarimi è n'usurpaturi e un tirannu: iu lu pruclamu mê nimicu" - Pierre-Joseph Proudhon)
Anarchìa è lu nsemi di rapporti antiauturitari ca ndividui e cullittivitati scègghinu pi rilazziunàrisi tra iddi.
Anarchìa è videmma la ricerca e spirimintazzioni di n'urganizzazzioni suciali urizzuntali ca si poni 'n tutali uppusizzioni e altirnativa cuncreta a l'attuali sistema di putiri ca veni cunziddiratu di l'anarchici statali, auturitariu, girarchicu, capitalisticu, militarescu.
Na sucitati anàrchica è na sucitati ca voli basàrisi supra lu libbiru accordu, supra la sulidaritati, supra li libbiri assuciazzioni, supra fidirazzioni, supra lu rispettu pâ sincula ndividualitati ca nun vulissi facirinni parti, secunnu lu principiu ca li dicisioni valinu sulu pi cu l'accetta.
'N na sucitati anarchica si rifiutanu quinni liggi, cumanni, mpusizzioni, principi funnati supra lu vuliri dâ majuranza, ripprisentanzi, discriminazzioni, castichi, verri comu mitodu pi risolviri cintrasti, rializzannu la gistioni e lu supiramentu dî cunflitti attraversu assimblei di cumunitati o chiarimenti e accordi tra li diretti ntirissati.
Lu pussessu è vidutu comu la pussibbilitati d'usari li cosi pû vantaggiu di tutti, nun comu chidda di privari àutri di ddi cosi. Na sucitati anarchica tenni a rializzari lu principiu "Di ciascunu secunnu li sô pussibbilitati, a ciascunu secunnu li sô bisogni". Tinennu cuntu dî risursi di cui si pò disponiri, sta frasi/frasa si pò liggiri macàri comu "di ciascunu secunnu li sô capacitati e ntinzioni, a ciascunu secunnu li pussibbilitati ginirali".
Nun vi vannu a essiri prisumibbirmenti sulu situazzioni di paci e ci vannu a essiri ancora cunflitti tra l'essiri umani, ma li cuntrappusizzioni vannu a essiri qualitativamenti diffirenti di chiddi attuali. 'N na sucitati anarchica la justizzia nun pò essiri prirugativa di n'istituzzioni, ma è ntô pircorsu d'accordu, ginirali o sinculari, culèttivu o ndividuali, tra li pirsuni. Lu dissensu e lu cunflittu sunnu ricanusciuti comu nurmali e umani; anarchicu è lu cèrcari/circari d'accurdàrisi.
L'idia di na sucitati anarchica fa quinni ripinzari la stissa sucialitati umana, obberu lu rapportu tra pirsuni, e quinni ammustra ch'è artificiusa la distinzioni tra pirsuna e sucitati. Na sucitati anarchica è funnata supra la pirsuna cuncreta e supra la sô capacitati di criari formi suciali; s'evita quinni di stabbiliri cûn prucessu d'astrazzioni dî valura murali assuluti e di criari strutturi funziunali a iddi videmma a discapitu dî pirsuni.
Secunnu lu pinzeru anarchicu li nicissitati di paci, justizzia e benessiri nun ponnu quinni justificari strutturi di putiri pubblichi quali statu, cresia e esercitu. Chiù ntô privatu, vannu ripinzati macàri famigghia, scola, e travagghiu comu sunnu cumunimenti ntisi.
L'idia di zocch'è bonu e disidirabbili/addisiabbili è nfatti suggèttiva, multiformi, mutèvuli, e nun si pò ripprisentari comu suvrumana, né s'hàvi a adurari 'n quantu entitati astratta, e tantu menu 'n forma cuircitiva.
La sucitati vuluta di l'anarchici rifiuta ca dî valura umani vennu mitizzati e cunziddirati comu supiriuri a òmini e fimmini cuncreti.
Nta na sucitati anarchica, si distincui nittamenti l'urganizzazzioni di putiri, auturitati e girarchia.
Partennu dû fattu ca putiri, auturitati e girarchia dunanu na libbirtati e na justizzia illusorii, pirchî sunnu funnati propiu supra lu cuntrariu dâ libbirtati e propiu supra lu cuntrariu dâ justizzia, 'n na sucitati anarchica si sequi lu filu d'arianna di l'antiauturitarismu versu iputesi urganizzativi di vita 'n cumuni, ca pirmèttinu na sempri majuri rializzazzioni dî putinzialitati ndividuali e cullettivi.
Na sucitati anarchica nun è pirciò na sucitati dû cunsensu chiù o menu estortu o ndottu, ma na sucitati cuntinuamenti rigginirata di l'accordu.
Secunnu lu pinzeru anarchicu sulu la libbirtati pò figghiari la libbirtati, sulu la justizzia figghia justizzia.
Arcuni muvimenti o ndividui anarchici, ntô cursu dâ storia, s'hannu risi prutagonisti di manifistazzioni viulenti nunchî d'attèntati. N'asempiu sturicu supra tutti, l'assassiniu d' Ummertu I di Savoia di parti di l'anarchicu Gaitanu Bresci ca dichiarau d'aviri uccisu pi vinnicari li migghiara di morti nnuccenti massacrati dû reggiu esercitu a Milanu quarchi annu prima. Vannu suttaliniati però videmma l'episodi 'n cui l'anarchici foru accusati nun justamenti di tali atti, si vidi p'asempiu lu casu di Saccu e Vanzetti nta l'USA di l'anni 1920 o la vicenna di Juseppi Pineddi ligata â straggi di Chiazza Funtana.
La fonti di st'articulu è Uicchipidia Taliana: http://it.wikipedia.org/wiki/Anarchia
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
