Pasqua Selis-Zau

Pasqua Selis-Zau (Nùgoro, 16 lampadas 1808 – Nùgoro, 30 ghennàrgiu 1882) est istada una rivolutzionària sarda. Connota fintzas comente Paska, Paschedda o Paskedda Zau, est intrada in s'Istòria de Sardigna pro àere ghiadu in su 1868 sa rebellia de Su Connotu, chi pigat su nùmene dae su cumbidu "Torramus a su connotu", contra a sa detzisione de su cussìgiu comunale de bèndere is terrinos de su demàniu, fintzas a cussu momentu de impreu pùblicu, pro pagare sa costrutzione de sa ferrovia.^[1][2]

Artìculu in LSC

Pasqua Selis-Zau
Àteros nùmenes	Paska Zau, Paschedda Zau, Paskedda Zau
Nàschida	16 de làmpadas de su 1808 Nùgoro
Morte	30 de ghennàrgiu de su 1882 Nùgoro
Natzionalidade	sarda
Tzitadinàntzia	italiana
Genitores	Mama: Elena Mele Babbu: Sebastiano Selis
Còjube	Salvatore Valerio Guiso
Contributos de importu	Àere ghiadu, in su 1868, sa rebellia de Su Connotu, chi pigat su nùmene dae su cumbidu "Torramus a su connotu", contra a sa detzisione de su cussìgiu comunale de bèndere is terrinos de su demàniu, fintzas a cussu momentu de impreu pùblicu, pro pagare sa costrutzione de sa ferrovia.

Biografia

Pasqua Selis-Zau est nàschida in Nùgoro dae Sebastiano Selis e Elena Mele. Su 10 de su mese de ledàmine 1828 s'est cojuada cun Salvatore Valerio Guiso e dae issu at tentu 10 fìgios. A pustis de sa morte de su pobiddu in su 1856, at bìvidu in poberesa fintzas a su 1882, cando est morta in localidade Sa conza de Nùgoro.^[3]

Su Connotu

Is Savoja aiant incumentzadu in su 1820 sa privatizatzione de is terrinos comunales, cun su Editto delle chiudende pro pagare s'arribu in Sardigna de sa ferrovia. In Barbàgia e Ogiastra sa gente si fiat bortada contra a custa lege, ca s'impreu de is terrinos abertos fiat pro medas famìllias s'ùnica manera de balangiare pro bìvere.

Su mangianu de su 26 abrile de su 1868, in Nùgoro a s'essida dae sa missa, Paschedda Zau in paris cun sa fìgia Tonia aiat incumentzadu a tzarrare a is fèminas de sa bidda chi comente issa sufriant su fàmene pro neghe de una carestia e non podiant pònnere aficu a is resursas de is terrinos de su demàniu chi fiant istados serrados pro ddos bèndere, impuntzende·ddas a si rebellare. A sa bèrchida "Torramus a su connotu", chi at dadu su nùmene a sa rebellia, sa truma at iscutuladu sa ghenna de sa sea de sa comuna, Domo Martoni, leadu is armas de sa Guàrdia Natzionale e postu fogu a is documentos de s'istadu tzivile e de is progetos de sa lotizatzione de is terrinos.^[1][4][5][6]

Sa rebellia est acabada cun s'arrestu de 69 rebelles dae is Carabineris, ma s'interventu de su deputadu Giorgio Asproni ddis at fatu otènnere s'amnistia.^[2]

Dèdica

Sa tzitade de Nùgoro at dedicadu una pratza a sa memòria de Pasca Selis Zau, in antis de Domo Martoni.^[7]

Notas

1. Sarvadore Serra, Nùgoro 1868, sa rebellia de Su Connotu, in Limba Sarda 2.0. URL consultadu su 2 maju 2020.
2. (IT) Paska Zau e i Moti "de Su Connottu", in Cronache Nuoresi, 2 santugaine 2016. URL consultadu su 2 maju 2020.
3. (IT) Una rivoluzionaria come Marianne, in La Nuova Sardegna, 28 martzu 2018. URL consultadu su 2 maju 2020.
4. (IT) Democrazia Oggi - Paska Selis Zau, la popolana de Su connottu, in democraziaoggi.it. URL consultadu su 2 maju 2020.
5. (IT) “Torramusu a su connottu”, Nuoro celebra il grido rivoluzionario di Paschedda Zau ^{[ligàmene interrùmpidu]}, in Santa Teresa Gallura, 25 abrile 2018. URL consultadu su 2 maju 2020.
6. (IT) Francesco Casula, Paskedda Zau: torramus a su Connotu, in Il Manifesto Sardo, 1º martzu 2020. URL consultadu su 2 maju 2020.
7. (IT) Piazza Paskedda Zau: omaggio all’eroina del comunitarismo ^{[ligàmene interrùmpidu]}, in La Nuova Sardegna, 6 maju 2019. URL consultadu su 2 maju 2020.

Bibliografia

• (IT) Omar Onnis e Manuelle Mureddu, Illustres. Vita, morte e miracoli di quaranta personalità sarde, Sestu, Domus de Janas, 2019, ISBN 978-88-97084-90-7, OCLC 1124656644. URL consultadu su 6 nadale 2019.