From Wikipedia, the free encyclopedia
Долиняне — найвекша етнографична група карпатскых Русинох, найдавнѣйше осаджена в южном подножу Карпат[1] и выразнѣ иншака в поровнаню зоз сосѣдныма групами (Гуцулами, Бойками, Лемками),[2] в украинской и российской историо- и етнографии поважована за Украинцьох.[3].
Назва долиняне,[1] або долешане,[3] мад. síklakók обывателе низины,[2] словац. Doľňane[4] ясно указуе на долину. Звыразнено выступать то в антонимичной парѣ словац. Doľňane a Verchovynci,[4] мад. або síklakók és hegylakók долиняне и верховинцѣ.[2]
Назва Долиняне ся в российской и украинской историографии и етнографии до самого послѣдного часу не поуживала: з идеологичных мотивох была выгодна и утримована тричленна схема Лемкы – Бойкы – Гуцулы, котра одповѣдать реалиям на сѣверной сторонѣ Карпат и мовчано сугеруе, же на южной сторонѣ не екзистуе нич инше лем продовжѣня того.[4]
Долиняне суть основны носителѣ русинской самобытности. Тота часть русинского обывательства уже в IX. – X. сторочах через географичны и политичны условия была одокремлена од восточнославянского масива и прилучена ку односинам и културным вплывам Дунайского базена, а од конця XI. стороча их територия была интегралнов частьов Мадярского кральовства. Иншакы историко-културны процесы стали ся важным фактором етно-културного вывою долинян: они набыли вецей сполочного в културѣ, историчных скушеностях, нормах справованя, родинном и газдовском животѣ зоз сосѣдныма народами, з котрыма жили в едной державѣ, неж з языково суродныма восточныма славянами. В добѣ народностной оброды народох Середньой Европы в XIX. сторочу якраз меджи долинянами взникло и розмогло ся усвѣдомлѣня окремой русинской идентичности, котре политично достало форму жаданя автономии.[1]
Подля Ш. Бонкала, долиняне, окрем на цѣлы стороча скоршого часу осаджѣня в Подкарпатю, одличують ся од сосѣдных русинскых груп тыж похождѣньом: языковы особитости указують, же их корѣня найвѣроятнѣйше в Подолю и волынском Полѣсю. Иншый быв и путь их прихода на Подкарпатя: аж до XVIII. стороча церковно были звязаны з Молдавиов, што нияк иншак не мож объяснити, лем так, же од тых сторон приходили. Верховинскы же групы доставали своих попох од Галича и одты ай переходили до Подкарпатя. Границя меджи нима иде примѣрно за линиов Луг, Воловое, Березникы, Перечин, Гуменне.[2]
Долиняне не суть цѣлком гомогенна група: найвыразнѣйшы роздѣлы указують ся у долинян бывшой жупы Мараморош (на восток од Хуста) — в архитектурѣ, организации двора, ноши, орнаментах, музичном фолклорѣ, кухни — суть то вплывы румынскы и балканскы. Долиняне на запад од Хуста во своей културѣ достали силны вплывы мадярскы, а в долинѣ Уга и восточной Словакии — словацкы.[1]
Seamless Wikipedia browsing. On steroids.