Головна бескидска маґістрала

Головна бескидска маґістрала имени Казімєжа Сосновского (поль. Główny Szlak Beskidzki imienia Kazimierza Sosnowskiego, "GSB") — піша турістічна маґістрала, котра переходить з Устроня в Слезскых Бескидах до Волосатого в Буковскых Верхах (поль. Бещады).

Найдовшый пішник в польскых горах, має около 496^[1] км довгости, проходить през Слезскы Бескиды, Бескид Жывєцкий, Ґорце, Бескид Сондецкий, Низкы Бескиды та Бещады. Переходячы през найвысшы часткы польскых Бескид дозволяє приступ на: Стожек Вєлькі (чеськ. Велькі Стожек), Бараню Ґуру, Бабю Ґуру, Полицю, Турбач, Любань, Перегыбу, Раджєёву, Яворину Криницьку, Ротунду, Церґову, Хрещату, Смерек і Галич та до населеных понктов як: Устронь, Венґєрска Ґурка, Йорданув, Ранка-Здруй, Крощєнко над Дунайцем, Ритро, Крениця, Івонич-Здруй, Риманів-Здруй, Команьча, Тісна, Устрики Горішні т т.д.

Головна бескидска маґістрала была вызначена в міджівоєнным періодѣ. Траса западной частини (Устронь - Крениця) была предпокладана Казімєжом Сосновским і докінчена в року 1929. Восточна частина, в згодї з проектом Мечислава Орловіча, была докінчена в року 1935 і водила аж до Чорногоры, котра находила ся в том часѣ в граніцѣ Польска. Міджі 1935 та 1939 носила імя Юзефа Пілсудского.^[2].

Головна бескидска маґістрала од Волосатого до долины рікы Ослава іде през терени де жыли Бойкы, а од долины Ославы до долины Попраду през Лемковину.

Нынї найкоротший час абсолвованя цїлой маґістралі приналежыть до Мацєя Вєнцека (inov-8 team PL) і выносить 114 годин і 40 минут. Гевтот выкон доказал зробити в дні 20 - 24 юнія 2013.^[3]. Передтым лем-лем 7 років тот рекорд приналежал до Пётра Клосовіча, котрому в септембрі року 2006 абсолвованя цїлой маґістралі взяло 168 годин^[4]. Обидва біжцї зробили то з востоку на запад, лемже Пётр Клосовіч зробил то без підпорной ґрупы, заты як Мацєй Вєнцек з підпоров.