From Wikipedia, the free encyclopedia
Генералный штатут про Подкарпатску Русь (повнов назвов Генералный штатут про организацию и администрацию Подкарпатской Руси, чеш. Generální statut pro organizaci a administraci Podkarpatské Rusi) быв правный акт, котрым ся становила юрисдикция Подкарпатской Руси або Русинии в Первой Чехословацкой републицѣ.
.svg)
Документ быв приготовленый одповѣдно до межинародных завязок Чехословакии подля Сен-Жерменского мирного договора (1919). Приготовили го в октобрѣ 1919 министер внутра Антонин Швегла (Antonín Švehla) и дочасный администратор Подкарпатской Руси Ян Брейха (Jan Brejcha).[1] Дня 7. новембра 1919 схвалила го чехословацка влада.[2] Выголосив го в Ужгородѣ 18. новембра 1919 французскый генерал Едмон Еннок (Edmond Ennocque), найвысшый велитель окупачной чехословацкой легии, яко прокламацию дочасного военного администратора под ч. 26536/1919, а подписав го быв тыж дочасный цивилный администратор Подкарпатской Руси Ян Брейха. Настала вшак безпрецедентна ситуация, коли штатотворный правный акт ани не быв публикованый в урядной Зберцѣ законох и заряджѣнь.[2]
29. фебруара 1920 была схвалена Конштитучна листина Чехословацкой републикы, в котрой была и клаузула о автономии Подкарпатской Руси. Ей законодарным органом мав быти Сойм, котрый мав право выдавати законы в языковой, школской и набоженской сферах. Але тоты законы еще потребовали подпис президента републикы, таксамо Конштитучный суд мав право рѣшати о платности або неплатности тых законох. Тото были одхылкы од установлѣнь Сен-Жерменского договора. Были и далшы одхылкы. Але теперь змѣненый генералный штатут заряджѣньом з дня 26. апрѣля 1920 ч. 356 Зберкы законох и заряджѣнь Чехословацкой републикы достав повну правну силу.[3]
Официална назва края была подля штатута Подкарпатска Русь (Podkarpatská Rus), але при том была доволена и назва Русиния (Rusínsko).[2]
Понеже границя зо Словакиев в дотогдышной Австро-Мадярщинѣ была внутриштатна рѣчь, штатутом была дочасно становена по рѣцѣ Уг.[4]
За язык урядованя и школной выукы означили мѣстный народный русинскый язык, але была то дефиниция барз неточна и тото дало ся знати гнедь в школном року 1919/20.[5]
Администрацию справовав дочасный администратор — быв ним Ян Брейха, а была му на помочи конзултачна пятьчленна рада, названа дочаснов Директориев, на челѣ котрой став Григорий Жаткович, америцкый правник.[6]
Вшиткы клаузулы штатута мали быти остаточно дефинованы подкарпаторуськым Соймом, котрый мав быти скликаный в часѣ до трьох мѣсяци по формованю пражского парламента. В реалности Сойм не скликали аж в року 1938.[7]
Але де факто владу справовав генерал Еннок и администратор Брейха без того, обы ся перед тым порадили з Директориев.[2]
Подля модификованого штатута намѣсто администратора теперь на челѣ автономной влады стояв губернатор, котрого меновав президент на пропозицию централной влады до того часу, покля ся не скличе Сойм. Губернатор мав право представляти Подкарпатску Русь на высшых мѣстах, меновати урядникох (окрем пошты, желѣзницѣ и мытницѣ). Цивилна справа была в руках вицегубернатора, котрый мав повинность информовати губернатора о своей чинности. Губернатор мог скасовати рѣшѣня вицегубернатора, але на то мав достати схвалѣня од централной влады. Намѣсто директории теперь была заведена Губерниална рада, до котрой 10 члены выберали старосты сел, а иншы 4 члены меновала централна влада. В пилных припадах мож было рѣшати и без выслуханя Губерниалной рады.[3]
Взглядом на то, же вицегубернатор все быв Чех, меновала го централна влада и ей подлѣгав,[8] мала централна влада справу Подкарпатской Руси певно контроловану.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
