Малый сен-жерменскый договор — договор меджи державами побѣдницями в Первой свѣтовой войнѣ и Чехословакиев, подписаный едночасно зоз великым договором (10. септембра 1919), на уточнѣня статей 53 и 57 основного договора, котры накладовали повинности на Чехословакию.
Понеже основный договор дотыкав ся територий Австрийского цѣсарства, там ся не говорило о словацкых и русинскых землях, што належали ку Мадярскому кральовству. Сама назва штату, указана в договорѣ яко Czecho-Slovak State, говорила, же Словаци суть ей частьов, але о Русинах лем мало упоминала Статья 53, котра говорила, же частьов Чехословакии буде «автономна територия Русинох на юг од Карпат». Мадярщина, захоплена комунистичновреволуциев, не была еще участницьов мирового процеса, зато требало лѣпше и повнѣйше окреслити вопрос Подкарпатской Руси.
Державы побѣдницѣ
Чехословакия здѣдила од Австрийского цѣсарства промыслово розвиты територии, а так видѣли можность часть терьху репараций покласти на ню. Дале, новостворена Чехословакия ставала ся многонародностна, зашто требало выразнѣйше выписати ей повинности сопротив народностным меншинам. Наконець, новы границѣ зликвидовали историчну сполочну польско-мадярску границю, што, з оглядом на припады чешско-польского и чешско-мадярского неприятельства з минулости, могло грозити транспортныма и торговыма проблемами в регионѣ.