From Wikipedia, the free encyclopedia
Константин Грабарь (*15. августа 1877, Унгвар, Мадярске кралевство — †21. децембра 1938, Ужгород, Чехословакия) — политичный, сполоченскый и державный дѣятель Подкарпатской Руси, третий губернатор Подкарпатской Руси.
| Константин Грабарь | |
|---|---|
 | |
3-й губернатор Подкарпатской Руси | |
| Во функции: | |
| 15. фебруар 1935[1][2] — 9. октобер 1938[3] | |
| Президент | Т. Г. Масарик |
| Предходник | Антоний Бескид |
| Наступник | Иван Парканий |
Староста Ужгорода | |
| Во функции: | |
| 1. януар 1928 — 20. май 1935 | |
| Уродив ся | 15. август 1877 Унгвар, Мадярске кралевство |
| Умер | децембра 21., 1938 (61 р.) Чертеж[3][4], Чехословакия |
| Горожанство | чехословацке |
| Народность | Русин |
| Политична партия | Аграрна партия (од р. 1925) |
| Отець | Леонтин Грабарь |
| Мати | Гелена Мондок |
| Вѣра | грекокатолицка |
Уряд губернатора Подкарпатской Руси заведеный в Закарпатю од року 1919 при Чехах. Первым губернатором быв родак Закарпатя америцкый подданый Григорий Жаткович (1886–1967). Знать история и другого губернатора, Антония Бескида (1885–1933). Ай третього а послѣдного, походжѣньом з давной поповской династии, сына Леонтина Грабаря зо Свалявщины, Константина Грабаря (1877–1938). Быв славный своев активнов чинностьов за обновлѣня Ужгорода, як быв мером, а пак старостом. К. Грабарь в 20. рокы 20. стороча протяг водовод и канализацию в центрѣ города, а инициованы ним великы ставебны роботы придали городу майже сучасну подобу. Тото под его веджѣньом Ужгород выбойовав право быти главным городом Подкарпатской Руси. В року 1935 менованый на губернаторство, а в року 1938 телефонным звонком знятый з уряду.
Родив ся 15. августа 1877 в Унгварѣ в священничой фамилии. Отець му, Леонтин Грабарь, быв грекокатолицкый священник в селѣ Дубровка. Мати, Гелена Мондок, была дѣвка унгварского каноника Ивана Мондока. Школу и гимназию выходив в Унгварѣ. По гимназии (1895) быв епископом Юлием Фирцаком посланый до духовной семинарии в Естергом, де учив ся в роках 1895–1898.[5] Довершив богословске образованя в Унгварѣ. Рукоположеный в духовный стан в року 1901.[1] Поповав в Лучках (1901–1908) и Дубровцѣ (1908–1921).[3]
На политичну сцену выступив во фебруарѣ 1919, коли быв выбраный на посланця Сойму Руськой Крайны,[3][5] створеной в децембрѣ 1918 автономной административно-территориалной части Мадярской Людовой Републикы. В марцу 1919, на первом и послѣдном засѣданю Сойма инициовав и добив ся принятя ултиматума до мадярской влады, з жаданьом до 8 дни вызначити официалны границѣ Руськой Крайны. В републицѣ став ся коммунистичный переворот, влада нич не одповѣла. Константин Грабарь став ся членом управы Центральной Руськой Народной Рады (ЦРНР), котра выголосила суглас з плебисцитом америцкых Русинох о прилучѣню Подкарпатской Руси ку Чехословакии (8. май 1919), и быв членом делегации, што еще того мѣсяця повезла до Прагы русинску декларацию.[5][3] На основѣ декларации ЦРНР и Сен-Жерменского договора 10. септембра 1919 Подкарпатска Русь стала ся автономнов частьов Чехословакии.
Од року 1921 лишать священничу карьеру и занимать пост директора Подкарпатского банка (1921–1928),[5] што мав филиалкы в Мукачовѣ, Хустѣ, Раховѣ и Пряшовѣ. Активный участник културного, господарского и политичного живота, член Кошицкой торговой и промысловой коморы, член дирекции Товаришства кооператорох.[1] Од року 1923 член муниципалной управы Ужгорода,[5][3] а од року 1928 — староста Ужгорода. В добѣ его староства Ужгород став ся з провинцийного городка административным центром европейского взора. Скорыма темпами выставили урядовый квартал Галагов, зачав роботу аеропорт,[6] водовод и канализация, ужгородска електрарня. Резултаты той роботы служать ужгородянам и нынѣ.[1][4][7]
Од рока 1925 быв членом провладной Аграрной партии, котра го рекомендовала на пост губернатора. 15. фебруара 1935 президент Чехословакии назначив Константина Грабаря на пост губернатора Подкарпатской Руси, а 1. марца 1935 новоназначенный губернатор склав присягу.[1]
| „ | Хочу, обы Подкарпатска Русь была силна, стойка, сконсолидована, и ей житя базовало ся на споеню всѣх народностных сил. Усилую ся до автономии нашой территории, котра бы благодатно послужила нашому маленькому дому…» | ” |
| Константин Грабарь, Прага, складаня присягы, 1. марец 1935[1] | ||
В часѣ губернаторства Константина Грабаря в столици Подкарпатской Руси появила ся помпезна административна будова Крайского уряду подля проекта архитектора Франтишка Крупкы, звана в людовой бесѣдѣ Народна рада, транспортный мост, днесь несучый имя первого президента Чехословакии. Розвивало ся школство, книговыданя. Будовали ся обытны домы, школы, болницѣ, административны объекты и др.
Але политична обстановка не дозволила досягти главны задекларованы политичны цѣли. Мюнхенска зрада активизовала процессы роспаду републикы. На территорию края засылали диверзны группы сѣверны и южны сосѣды. 2. новембра 1938 Вѣденскым арбитражом Подкарпатска Русь была збавлена южной части, своей столицѣ Ужгорода и стратила еще два векшы городы, Мукачово и Берегово. Вшыткы уряды Подкарпатской Руси мали быти евакуованы и зачати переданя территории уже 5.10.1938 и закончити 10.10.1938.[8]
9. октобра 1938 Константин Грабарь резигновав з функции про несуглас з централнов владов, а функции губернатора перебрав Министер про Подкарпатску Русь Иван Парканий.[5][3] Неодовго, зармученый скрахованьом своих амбитных планох, Константин Грабарь одышов на правду Божу 21. децембра 1938 в селѣ Чертеж, в родинном маетку.[4] Погреб одбыв ся 23.12.1938.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
