Бѣ́лкы, укр. Білки — мѣстечко в бывшом Иршавском районѣ[3] Закарпатской области Украины, центер сельской рады.[1]
Коротка інформація
Закрити
Лежить на правом березѣ Боржавы о 8 км од бывшого районного центра Иршава.[1][4]
- Мадярска доба
- Перва упоминка о селѣ в жерелах датована роком 1245, коли краль Бейла IV. даровав село землепану Карачоньи.[1][4]
- Од зачатку XIX. стороча в селѣ добывають желѣзну руду, вытоплюють желѣзо, фунгуе пила и даколько млинох, выпалюють вапно. Од року 1830 Бѣлкы стають ся великым торговым селом, на тутешны торговицѣ ходили не лем з цѣлого краю, але и з Галичины.[4]
- В року 1910 в Бѣлках было 4675 обывательох русинской и нѣмецкой народности, пошта, телеграф, сельска позычкова кооперация и каса самомопомочи.[5]
- Чехословацка доба
- В року 1923 отворена горожанка, а в року 1925 при ньой за кошты Червеного Креста отвореный интернат. В року 1938 до Бѣлок перемѣщена Береговска украинска гимназия.[4]
- В року 1930 зоз 5614 обывательох были 4424 Русины, 1068 Евреи, 56 Мадяре, 41 Чехы и Словаци, 1 Нѣмець, 7 иншых народностей и 17 чужоземцьох. Векшина Русинох были православны — 2287 (51,6%), иншы — грекокатолици. Социалну и медицинску помочь подавала станиця Червеного Креста.В Бѣлках быв нотарскый уряд, пошта, телеграф, телефон, жандарска станиця, основна школа русинска (8 клас) и чешска (5 клас), горожанка русинска (4 класы) и чешска (3 класы). Грекокатолицка мурована церква Успѣня Пресвятой Богородицѣ была высвячена в року 1838, деревяна православна церква Святых Петра и Павла — в року 1920.[6]
- Украинска доба
- 25. октобра 1944 до Бѣлок вступила Червена армада, зачала ся украинска доба истории села, и 126 его обывательох были мобилизованы до совѣтского войска. Панскы землѣ были роздѣлены меджи газдами, але уже 15. марца 1948 быв створеный колгосп и вшиткы подарованы землѣ од них забрали. В року 1966 в Бѣлках отворили ставбарску промысловку, а в року 1967 — промыслову выробу сокох, вин и сливовицѣ. Фунговали два камѣнны ломы, цех на выробу сухых и олейовых фарб.[4]
Бѣлкы тяжко пережили повѣнѣ в роках 1998, 2001, 2005. В року 2005 епископ Милан Шашик освятив церкву XIX. стороча, котра была реставрована по тому, як в совѣтской добѣ была заперта и хоснована як музей атеизма. В року 2009 отворили памятник Ивану Фирцаку “Кротону”, бѣлецкому родакови.[4]
Сергій Федака, сс. 21–23.
Révai nagy lexikona,том 3, с. 313.