Sisteme 'Ndernazionale de aunità de mesure
From Wikipedia, the free encyclopedia
'U Sisteme 'Ndernazionale de aunità de mesure (jndr'ô frangise Système international d'unités), abbreviate jndre SI e pronungiate esse i[1], jè 'u cchiù diffuse 'mbrà le sisteme de aunità de mesure. Assieme a 'u Sisteme CGS, jè spesse indicate cumme sesteme metriche decimale, specialmende jndre le paise anglosassone.
Le aunità, 'a terminologgije e le raccomandazione d'u Sisteme 'ndernazionale sonde stabelite d'a Conférence générale des poids et mesures (CGPM), denominate jndre 'u tarandìne "Conferenze generale de le paise e de le mesure", organisme cullegate cu 'u Bureau international des poids et mesures (BIPM), chiamate jndre 'u tarandìne "Ufficie 'ndernazionale de le paise e de le mesure"; totte e doje le organisme sonde state crejete durande 'a Convenzione d'u Metre d'u 1875.
Quiste sisteme de grannezze fiseche e aunità de mesure nasce jndr'ô 1889 cu 'a 1ª CGPM e da stù momende se chiame "Sisteme MKS" purcé combrendeve sule le aunità fondamendale de lunghezze (metre), masse (chilogramme) e timbe (seconne). Jndr'ô 1935, sus a 'na proposte d'u fiseche tagliàne Giuanne Giorgi, 'u sisteme fù denominate "Sisteme MKSΩ" ed adottate d'a Commissione Elettrotecniche 'Ndernazionale, purcé 'a quarte aunità fondamendale 'ndrodotte fu l'ohm, pè 'a mesure d'a resistenze elettreche. Jndr'ô 1946, sus a 'na proposte de Giuanne Giorgi, 'a CGPM approve 'a trasute de l'ampere cumme aunità de mesure fondamendale d'a corrende elettreche, pè sostituì 'a resistenze elettreche. Nasce accusì 'u "Sisteme MKSA", chiamate pure "Sisteme Giorgi" 'n onore d'u fiseche. Jndr'ô 1954, 'a 10ª CGPM, mitte pure 'u kelvin e 'a candele cumme aunità de mesure fondamendale. Jndr'ô 1961 'a 11ª CGPM sancisce 'a nascite d'u Sisteme 'ndernazionale (SI). Jndr'ô 1971 'a 14ª CGPM mitte pure 'a mole 'mbrà le aunità fondamendale de quiste sisteme.
Ôsce, accusì, 'u SI jè basate sus a sette grannezze fiseche fondamendale (cu le respettive aunità de mesure), cu le quale sonde definite le grannezze fiseche derivate (e respettive aunità de mesure). 'U SI, inoltre, definisce 'na sequenze de prefisse da premette a le aunità de mesure pè identifecà le lòre multiple e sottomultiple.
'U Sisteme 'ndernazionale jè 'nu sisteme coerende, purcè le soje grannezze fiseche e aunità derivate se recavane cumme prodotte de grannezze fiseche e aunità fondamendale.