From Wikipedia, the free encyclopedia
Publio Virgilio Marone, in latine Publius Vergilius Maro (Andes, 15 ottommre 70 n.C. – Brinnese, 21 settemmre 19 n.C.), ha state 'nu poete romano.
| (LA)
«Mantua me genuit, Calabri rapuere, tenet nunc Parthenope; cecini pascua rura duces» |
(ROA–TARA)
«Me facìe Mantova, me rapirene le Calavrise, mò me tène Napule; candeve le paschele, le cambagne, le eroe» |
| (Epitaffie) | |
Publio Virgilio Marone
Nascìe a le Idi de ottommre d'u 70 n.C. vicine Mantova e precisamende jndr'à 'u villagge de Andes, località identificate da 'u XIII sechele cu 'u borghe de Pietole (jndr'à stu mode se esprime Dante jndr'à Divina Commedia (Priatorie, 18,83).
L'attane, de nome Stimicone Virgilio Marone (citate jndr'à le Bucoliche, V, 55), ere 'nu proprietarie terriere peccinne arrecchisciute grazie a l'apicolture, l'allevamende e l'artiggianate invece 'a mamese, de nome Polla Magio, ere 'a figghie de 'nu mercande ricche assaije, Magio, a 'u servizie d'u quale avère fatiate l'attane d'u poete.
Virgilio apprime studiò a Cremona, pò a Meláne e infine a Rome studianne lettere greche e latine ma pure matemateche e medecine. Jndr'à 'u soggiorne romane sue, 'u future poete infatte facìe pure 'nu veterinarie pe cavaddere pe l'imberatore Augusto. Pò jndr'à capitale purtò a termine 'a propria formazione oratorie studianne eloquenze a 'a scole de Epidio, 'nu maestre 'mbortande de quedd'epoche. 'U studie de l'eloquenze avèra fà de jidde 'n'avvocate e aprirle 'a vie pa conguiste de le varie careche politeche. L'oratorie di Epidio non g'ere certe congeniale a 'a nature d'u mite Virgilio, riservate e timide e quindi assaije none adatte a parlà in pubbleche. Infatte jndr'à prima causa soje cumme avvocate non ge riuscì nemmanghe a spiccicà 'na parole. Cchiù nnande a stu fatte Virgilio trasì in crisi esistenziale ca 'u porte a 'nu spustamende apprisse 'u 44 n.C. a Napule, addò se ne scìe a 'a scole de le felosofe Sirone e Filodemo pe 'mbarà le precette de Epicuro, e addò canuscìe 'nu sbuènne de personagge 'mbortande jndr'à 'u cambe politeche e artisteche ('mbrà le quale Orazio).
Le anne jndr'à le quale Virgilio se iacchie a vivere sonde anne de granne sconvolgeminde a cause de le uerre civile: apprime 'u scondre 'mbrà Cesare e Pompeo, spicciate cu 'a sconfitte de st'urteme a Farsalo (48 n.C.), pò l'uccisione de Cesare (44 a.C.) duranne 'na congiure e 'u scondre 'mbrà Ottaviano e Marche Andonie da 'na vanne e le cesaricide (Bruto e Cassio) da l'otre, spicciate cu 'a battagghie de Filippi (42 n.C.).
Virgilio avenìe tuccate direttamende da ste tragedie: infatte 'a distribuzione de le terre a le veterane apprisse 'a battagghie de Filippi mettìe in grave pericole le proprietà sue jndr'à 'u mantovane ca avenèrene confiscate a l'attane e a le frate, le quale se spustarene pò a Napule cu 'u poete. Da quidde timbe pe totte 'a vite Virgilio, attraverse l'opera soje, cerche appogge e aiute da diverse personagge politece (Pollione, Varo, Gallo, Mecenate e 'u stesse Augusto) ma senze maje riuscì a ottenè ninde.
Apprisse 'u successe de le Bucoliche, avenìe in condatte cu Mecenate e trasì a fà parte d'u circhele sue, ca raccugghieve 'nu sbuènne de letterate famose de quedd'epoche. 'U vate frequendave le tenute terriere de Mecenate, ca jidde possedeve in Campania vicine a Atella e in Sicilia. Attraverse Mecenate, Virgilio canuscìe Augusto e collabborò (pare jndr'à 'nu mode forzate) a 'a diffusione de l'ideologgie politeca soje. Addevendò 'u maggiore poete de Rome e de l'Imbere.
Murìe a Brinnese 'u 21 settemmre d'u 19 n.C. (Calendarije giuliane), de retorne da 'n'imbrovvise viagge in Grecie, seconde le biografe pe 'na 'nzulagnate (o colpe de sole). Infatte,, apprime de partì, Virgilio raccomandfò a le combagne de studie sue, Tucca e Varo, de destruggere 'u manoscritte de l'Eneide. Ma le doje, pe paure o pe colpe, conzegnarene le manoscritte a l'Imberatore.
Le reste d'u granne poete avenèrene pò trasportate a Napule, addò sonde custodite jndr'à 'nu chiaute angore osce a die visibbele, sus 'a colline de Posillipo. Purtroppe l'urne ca condeneve le spogghie avenìe disperse jndr'à 'u Medioevo. Sus a 'u chiaute avenìe mise l'epitaffie famose: Mantua me genuit, Calabri rapuere, tenet nunc Parthenope; cecini pascua, rura, duces; ca signifeche: "Me facìe Mantova, me rapirene le Calavrise [le Pugghise], mò me tène Partenone [Napule]; candeve le paschele [le Bucoleche], le cambagne [le Georgeche], le eroe [l'Eneide]"
'Nu prime gruppe de opere (note da 'u Cinghecinde cumme Appendix Vergiliana) avenìe comboste 'mbrà 'u 44 n.C. e 'u 38 n.C. 'mbrà le cetate de Rome e Napule;
| Latine - (LA) | Tarandine - (ROA–TARA) | Tagliàne - (IT) |
|---|---|---|
| Catalepton | A 'a spicciolate | Alla spicciolata |
| Moretum | Focazze | Focaccia |
| Priapea | Cande a Priapo | Canti a Priapo |
| Aetna | Etna | Etna |
| Copa * | Oste * | Oste * |
| Res romanae ** | Fatte romane ** | Gesta romane ** |
| Dirae | Sinanghe | Maledizioni |
| Ciris | Airone | Airone |
| Culex | Zanzare | Zanzara |
| Epigrammata *** | Epigramme *** | Epigrammi *** |
* sulamende seconde 'u biografe Servio
** opere sulamende pruggettate e pò abbandunate
*** Vide a tavule de sotte pe vedè ce ccose combrendene
Tavule cu le condenute de l'Epigramme
| Latine - (LA) | Tarandine - (ROA–TARA) | Tagliàne - (IT) |
|---|---|---|
| Rosae | Le Rose | Le Rose |
| Est et non | E non g'è | E non è |
| Vir bonus | Bbuène omme | Uomo buono |
| Elegia in Maecenatis obitu | Elegie a Mecenate | Elegia a Mecenate |
| Hortulus | Hortulus | Hortulus |
| De vino et Venere | 'U vine e Venere | Il vino e Venere |
| De livore | 'U livore | Il livore |
| De cantu Sirenarum | 'U cande de le Sirene | Il canto delle Sirene |
| De die natali | 'U sciurne natale | Il giorno natale |
| De fortuna | 'A furtune | La fortuna |
| De Orpheo | Sus a Orfeo | Su Orfeo |
| De se ipso | Sus a jidde stesse | Su sè stesso |
| De aetatibus animalium | Le età de le animale | Le età degli animali |
| De ludo | 'U sciueche | Il gioco |
| De aerumnis Herculis | De aerumnis Herculis | De aerumnis Herculis |
| De Musarum inventis | De Musarum inventis | De Musarum inventis |
| De speculo | 'U specchie | Lo specchio |
| Mira Vergilii versus experientia | Mira Vergilii versus experientia | Mira Vergilii versus experientia |
| Mira Vergilii experientia | Mira Vergilii experientia | Mira Vergilii experientia |
| De quattuor temporibus anni | Le quattre timbe de l'anne | I quattro tempi dell'anno |
| De ortu solis | 'A nascite d'u sole | La nascita del sole |
| De Herculis laboribus | Le fatìe de Ercole | I lavori di Ercole |
| De littera Y | 'A lettere Y | La lettera Y |
| De signis caelestibus | Le siune celeste | I segni celesti |
Ogne libbre presende 'na digressione: 'u prime sus 'a morte de Cesasr,e 'u seconde cu l'elogge a l'Itaglie, 'u terze sus 'a peste. 'U poeme se conglude cu l'esposizione d'u mite de Aristeo. Avveramende, jndr'à prima stesure de le Georgiche, 'a conglusione d'u IV libbre ere dedicate a Cornello Gallo ma, cadute quiste in disgrazie presso Augusto, a Virgilio avenìe pò ordinate de congludere l'opere jndr'à 'nu mode differende. L'opere avenìe dedicate a Mecenate. Se tratte sicuramende de une de le cchiù granne capolavore d'a letterature latine e l'espressione cchiù ierte de l'autentiche e vere poesie virgiliane. Le modelle aqquà seguite sonde Esiodo e Varrone.
Naturalmende 'u modelle avère state Omero. St'opere conde 'a storie de Enea, esule da Ilio e fonnatore d'a divina Gens Giulia. Seconde certe biografe l'opere s'avera articolà sus a vendiquattre libbre, ca combrendevane 'a storie romane 'mbonde a le timbe de Augusto. 'U poeme remanìe prive de revisione, e nonostande Virgilio apprime de paertì pe l'Oriente ne cercasse 'a distruzione e ne vietasse 'a diffusione ce jidde avesse muèrte, l'opere avenìe 'u stesse pubblecate pe volondà de l'Imberatore.
'A fame d'u vate apprisse 'a morte ha state accussì granne ca jidde avenìe conziderate 'na divinità degne de ricevere onore, lode, preghiere e rite sacre. Già Silio Italico (apprisse 'nu sechele), ca accattò 'a ville e 'u chiaute de Virgilio, istituì 'na celebrazione in memorie d'u Mantovano jndr'à 'u sciurne de nascite (le Idi de Ottommre). Jndr'à stu mode sta celebrazione s'à tramandate anne pe anne jndr'à le prime sechele de l'era volgare, devendanne 'nu punde de referimende 'mbortande soprattutte pu popole napuletane ca vedìe in Vergilius 'u seconde patrone sue e spirite protettore d'a cetate de Napule, apprisse 'a vergine Partenope. A le reste sue (cenere e osse), conzervate jndr'à 'u sepolcre da jidde stesse congepite seconde forme e proporziune pitagoreche, avenìe attribbuite 'u potere de proteggere 'a cetate da le invasiune e da le calamità. Pure ca le divinità pagane avenevane dimendicate, de Virgilio se mandenìe comungue intatte 'u recorde, e le opere sue avenèrene inderpretate crestianamende.
Jidde addevendò in particolare 'nu simbele de l'identità e d'a libbertà politeche de Napule: ha state pe quiste ca jndr'à 'u XII sechele le conguistature normanne, cu 'u consense inderessate d'a Chiesere de Rome, acconsentirene a 'nu felosofe e negromante inglese de nome Ludowicus de profanà 'u chiaute de Virgilio cu 'u scope de luà e asportà 'u vase cu le osse sue, a 'u fine de indebbolì e sottomettere Napule a 'u potere normanne distruggenne l'oggette de culte ca ere 'a base simboleche de l'autonomia soje. Le reste de Virgilio avenèrene sarvate da 'a popolazzione ca le trasferì a jndr'à 'u Castel de l'Ove, ma cchiù nnande avenèrene aqquà sotterrate e ascunnute pe sembre a opere de le Normanne. Da allore le napuletane retènerene ca 'u potere protettive d'u Poete verse 'a cetate avesse state annullate. E 'a storie de Napule (caratterizzate da lunghe dominaziune furastiere e da 'a manganze de autonomie) jndr'à le sechele successive a 'u XII pare confermà 'a lore convinzione.
'U recorde de Virgilio però, soprattutte jndr'à 'u popole napuletane, remanìe sembre vive. A 'a fame de sapiente pa tradizione colte, cu 'u timbe se affiangò quedde de maghe jndr'à tradizione popolare, intese cumme omme ca canosce le segrete d'a nature e ne face ause a fine de bbene. De sta inderretazione ne reste 'nu corpus vasce-medievale de leggende ca onne cumme sfonde soprattutte le cetate de Rome e Napule: pe esembie, tande pe cità 'nu fatte, quedde ca 'u vedìe costruttore d'u Castel de l'Ove maggicamende edificate sus a 'u gusce de 'n'ove maggiche de struzze ca s'avere sckuasciate sula quanne 'a fortezze avesse state definitivamende espugnate, oppure quedde ca riguarde 'a ccrejazione e 'u scunnemende sotterranèe de 'na specie de palladio ('na riproduzione in miniature d'a cetate de Napule condenute jndr'à 'na bottigghie de vitre da 'u colle fine fine) ca pe maggie pruteggie 'a cetate da le sciagure e da le invasiune fine a ca non ge avenìe acchiate e distrutte da Corrado di Querfurt, cangelliere de l'imberatore Enrico VI inviate jndr'à 'u XII sechele a conguistà 'u Regne de Sicilia (ca jndr'à quidde timbe combrendeve pure 'a cetate de Napule).
Durande 'u Medioevo ierte, Virgilio avenìe lette cu ammirazione, e stu fatte permettìe a l'opere sue de essere tramandate combletamende. L'inderpretazione de l'opere virgiliane ausò assaije proprie 'u strumende de l'allegorie: a 'u poete avenìe infatte attribbuite 'nu ruole de profete de Criste, basannese sus a 'nu brane de le Bucoliche (la IV ecloga) ca annungiave 'a venute de 'nu peccinne ca avesse repurtate l'età de l'ore e idendificate pe quiste cu Gesù.
Virgilio avenìe allore rappresendate cumme vate, maestre e profete jndr'à Divina Commedia (Priatorie, cande XXII, vv. 67-72) da Dante Alighieri, 'u quale ne facìe 'a proprie guide attraverse le girune d'u 'Nfirne e d'u Priatorie.
|
«O de li altri poeti onore e lume, |
| ('Nfirne, Cande I, 81-83) |
A 'u somme poete latine jè inditolate l'Accademie Nazionale Virgiliane de Mantova.
Cumme strette amiche de personagge de potere e de 'n'influenze assaije granne cumme l'imberatore Augusto, d'u guvernatore provingiale de l'Egitto Gaio Asinio Pollione e d'u ricche Gaio Cilnio Mecenate, 'u granne poete putè beneficià jndr'à 'nu sacche de mode 'a cetate de Napule jndr'à quale jidde amave proprie remanè.
Le biografe medievale sue infatte ne condene ca ha state Virgilio a consiglià a l'Imberatore de costruì 'n'acquedotte (proveniende da le sorgende vicine a Serino jndr'à l'Avellinese) ca servive queste e pure otre cetate cumme Nola, Avella, Pozzuoli e Baia.
Pò esortò Augusto a ccrejà pe Napule 'na rezze de pòzzere e fundane pe l'approviggionamende idriche, 'nu sisteme fognarie de cloache e comblesse termale terapeutece a Baia e Pozzuoli, pe le quale avere addevendate necessarie scavà 'nu traforo granne granne jndr'à colline de Pusillepe, quedde ca osce a die jè 'a "Grotte de Pusillepe", famose pe stu mutive 'mbonde a 'u XIV sec. cumme "Grotte de Virgilio".
'N'otre provvedimende ca 'u vate facìe pigghià a l'Imberatore avère state l'istituzione de 'nu particolare sciuèche de lotte 'mbrà gladiature, allore famose cumme "sciuèche d'a Carbonara", da a quande pare osce a die derive 'u toponeme d'a via d'a Carbonara (ca se iacchie jndr'à 'u quartiere San Lorenzo).
Infine, Virgilio, essenne grandemende appassionate de divinazione e d'u munne d'a releggione in generale (cumme se note pure da le opere letterarie sue), facìe installà doje sculture de cape umane in marme, une de 'nu maschele e allegre, l'otre de 'na femmene e triste, sus a le mure d'a cetate e precisamende a le late d'a porte de Forcelle a 'u fine de dà 'nu presagge casuale bbuène o brutte ('na sorte de innocue cefalomanzie minerale) pe le cetadine de passagge.
Cu l'allariamende de le muraziune oriendale jndr'à 'u periode aragonese, le cape avenèrene spustate jndr'à lussuosa ville reale de Poggioreale ca scerene però perdute pe colpe d'a distruzione d'u comblesse.
Cumme reportane le cchiù andiche biografe suem Virgilio pigghiò parte a 'u neopitagorisme, corrende felosofeche e maggiche allore assaije diffuse jndr'à Magna Grecie, e in particolare a Neapolis, une de le picche cetate d'u Meridione ca apprisse 'a conguiste romane avere conservate 'a vita culturale sue genuinamende elleneche.
In quande felosofe neopitagoreche e maghe le avenene attribbuite nove talismane de protezione pa cetate de Napule ca tande amò, seconde le biografe medioevale e rinascimendale ('mbrà le quale se distingue Paracelso).
Uicchimedie Commons tène files multimediale sus Publio Virgilio Marone| Condrolle de autorità | VIAF (EN) 8194433 · ISNI (EN) 0000 0004 3069 5667 · SBN (IT, EN) CFIV008978 · BAV (EN, IT, JA) 495/15609 · CERL (EN) cnp01259754 · Europeana (EN) agent/base/60298 · ULAN (EN) 500337098 · LCCN (EN) n79014062 · GND (DE) 118626574 · BNE (ES) XX874783 (data) · BNF (FR) cb11887823w (data) · J9U (EN, HE) 987007269570705171 · NSK (HR) 000025569 · NDL (EN, JA) 00459674 · CONOR.SI (SL) 8211555 |
|---|
|
Virgilio (69 n.C. - 18 n.C.) | |
| Opere: Appendix Vergiliana - Bucoliche - Georgiche - Eneide | ||
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
