وچکارلا ایشیا
From Wikipedia, the free encyclopedia
وچکارلا ایشیا ، لہندے پاسے کیسپیئن سمندر توں لے کے چڑھدے پاسے چین تک اُبھے پاسے روس دیاں لموچی سرحداں توں لمے پاسے پاکستان دے اُبھے پہاڑی علاقےآں تے براعظم ایشیا دا اک خِطا اے ۔ ایہنوں اندرلا ایشیا وی آکھیا جاندا اے ۔ کیوں کہ ایہ علاقا براعظم ، ایشیا دا اندرلا علاقا اے ۔ تریخی طور تے وچکارلا اشیا دا پکھی واس قبیلےآں تے مشتمل اے ۔ شاہراہ ریشم نال ایہدا گہرا تعلق رہیا اے تے اس پاروں یورپ ، لہندے ایشیا ، لمے ایشیا تے چڑھدے ایشیا وچکار خیالات تے نظریات ، لوکاں تے شیواں دی نقل و حمل وچ ایس شاہراہ نے بڑا کم کیتا ۔ جدید پیرائے وچ وچکارلے ایشیا ، سابق سویت یونین توں آزاد ہوݨ آلے پنج مسلم مُلکاں ، قازقستان ، کرغیزستان ، تاجکستان ، ترکمانستان ، ازبکستان تے افغانستان ، اُبھا چڑھدا ایران ، چین دے لہندے علاقے چڑھدا ترکستان ، منگولیا ، اُبھا پاکستان ، لموچی لہندے چین دے علاقے تبت تے گانسو ، اندرلا منگولیا تے سائبیریا دے لمے پاسے دے حصے وی وچکارلے ایشیا وچ شامل کیتے جا سکدے نیں ۔ وچکارلا ایشیا بہت سارے ترک لوکاں تے قبیلےآں دا وطن وی اے ۔ جیہناں وچ ازبک ، قازق ، کرغیز ، ترکمان تے ایغور شامل نیں ۔ ایسے لئی وچکارلے ایشیا نوں ترکستان وی کہیا جاندا اے ۔