جارج واشنگٹن

جارج واشنگٹن (22 فروری 1732 - 14 دسمبر 1799) امریکہ دے موڈیاں وچوں اک سی اونے امریکہ دی انقلابی لڑائی چ امریکی فوجاں دی آگمانی کیتی تے اوناں نوں جتایا، اوہ اوس سنگت دا وی آگو سی جیہنے امریکی قنون بنایا تے امریکی قنون باجوں ای اوہنے فوجاں دی آگمانی کیتی تے فیر امریکہ دا پہلا صدر بنیا۔ امریکہ بنان چ خاص کم کرن لئی اونوں امریکہ دا پیو کیا جاندا اے۔

جارج واشنگٹن
امریکہ دا پہلا صدر
جیون:	22 فروری 1732 ورجینیا 14 دسمبر 1799 ورجینیا
کم :	زمیندار ، سپاہی
ویلہ:	اپریل 30, 1789 – مارچ 4, 1797
ٹبری:	مارتھا واشنگٹن
دسخط:

جم پل (1732–1753)

جارج واشنگٹن، آگسٹین واشنگٹن تے اوہدی دوجی ٹبری میری بال واشنگٹن دا پہلا پتر سی۔ اوہ 22 فروری 1732 نوں ورجینیا دی ویسٹمورلینڈ کاؤنٹی وچ جمیا۔ اوہدے پرکھ انگلینڈ توں ایتھے آۓ سن تے زیمیدارا کردے سن۔ واشنگٹن دے پرکھ سلگریو، انگلینڈ توں سن۔ اوہدا پردادا 1657 وچ ورجینیا آیا۔ جارج دا پیو آگسٹین غلاماں دا مالک تے تماکھو اگاندا سی مگروں اوہ فیر لوآ کڈن دے کم وج پیا۔ اوہ ورجینیا اک وشکارلی پدھر دا ٹبر سی۔ اوہ 11 سال دا سی جدوں اوہدا پیو مرگیا۔ اوہ اپنے گھر وج ای کئی استاداں کولوں پڑھیا۔ اوہدا چوکھا سارا مڈھلا جیون فیری فارم، سٹیفورڈ کاؤنٹی ورجینیا وچ لنگیا۔ پیو دے مرن تے فیری فارم اوہدے حصے وچ آیا۔ اوہدے وڈے بھرا دے حصے وچ پوٹومک دریا دے کنڈے تے اک زمین آندی اے جینوں ماؤنٹ فرنن دا ناں دتا جاندا اے ایہہ اوہدے بھرا دے مرن تے واشنگٹن نوں ملدی اے۔ اوہ 17 سال دا سی 1749 نوں جدون اوہنوں کلپیپر کاؤنٹی دا سرویر لگا دتا جاندا اے۔ کمائی چنکی سی تے اوہنے پیسے بچا کے شینندوح وادی وچ زمین ملیں لئی۔ ایہ لیندے ورجینیا وچ کئی زمین لین دے بپاراں وچوں اک سی۔ 1751 وچ واشنگٹن باربادوس اپنے پرا لارنس نال جینوں ٹی بی ہوگئی سی جاندا اے ایس آس نال جے اوتھوں محول اودے لئی جنگا رویگا ایس سفر وچ اوہنوں چیچک ہوجاندی جیدے نشان اوہدے منہ تے رہ جاندے نیں۔ اوہدا پرآ ول نئیں ہوندا اوہ واپس اندے نیں تے مانٹ ورنن وچ 1752 نوں لارنس مر جاندا اے۔ اوہدی تھاں تے جارج واشنگٹن نوں ورجینیا ملیشیا وچ میپر رکھ لیا جاندا اے۔ ایسے ویلے ای جارج فری میسنری اک رلتی سنگت نال جڑدا اے۔

فرانسیسی انڈین لڑائیاں (1760–1753)

1753 وچ فرانسیسی اوہائیو ول اگے ودن لگدے نیں پر ایس علاقے تے برطانوی امریکی دیساں پنسلوینیا تے ورجینیا نے وی کلیم کیتا ہویا سی۔ ایس تے فرانسیسی انڈین لڑائیاں (1754–62) دا مڈھ بجدا اے جیہڑیاں فیر ساری دنیا تے پھیلدیاں نیں ایہناں نوں ست سالہ لڑائیاں وی کیا جاندا اے۔ واشنگٹن ایہناں لڑائیاں دے مڈھ تی سی۔ گورنر ڈنوڈی نوں برطانوی سرکار ولوں ایہ سنیہہ ملدا اے جے اوہ فرانسیسیاں نوں ایس کم توں روکن بارے آکھے۔ گورنر، میجر واشنگٹن نوں اک سنیہے نال 1753 دے انت وچ فرانسیسیاں ول کلدا اے جے اوہ اوہناں نوں آکھے جے اوہ ایتھوں ٹر جان۔ فرانسیسی فوجی آگو ایہ گل نئیں مندا۔ واشنگٹن اوتھے انڈین قبیلیاں نال وی ملدا اے جیہڑے ورجینیا نال سن۔ 1754 وچ واشنگٹن دی فوجی ٹولی نال فرانسیسیاں نال ٹاکرا ہوندا اے۔ 1755 وچ فرانس تے برطانیہ ایس تھاں تے مل مارن لئی اک دوجے سامنے کھڑے سن۔

واشنگٹن, برطانوی جرنیل ایڈورڈ بریڈوک نال اوہدا اتلی پدھر دا سنگی سی۔ مونونگاہیلہ دی لڑائی وچ فراسیسی تے اوہناں دے انڈین سنگی لک کے ایس برطانوی امریکی فوج تے ہلہ بولدے نیں تے ایہنوں پچھے نسا دیندے نیں۔ 1755 وچ ورجینیا دا گورنر اوہنوں ورجینیا ملیشیا دا آگو بنادیندا اے تے ورجیینیا دی ولگن دا بچاؤ کرنا اوہدی زمیواری سی۔ ورجینیا ملیشیا نوں ہر ویلے تیار فوج بنایا جاندا اے تے اینج ایہ امریکہ دی پہلی فوج سی۔ واشنگٹن نوں ایہ آڈر سی جے اوہ ہلہ بولے یا بچا کرے اوہ اپنے فیصلے وچ ازاد اے۔ اپنی فوج دی سکھلائی ودیا کیتی تے اوہدی نس پج دا ایہ فیدا ہویا جے ورجینیا دے لوکاں دی بچت دوجیاں صوبیاں نال ود سی۔ برطانوی فوج اوہائیو تے مل مارلیندی اے۔ واشنگٹن دسمبر 1758 نوں فوج جھڈ دیندا اے تے 1775 دے انقلاب تک فوج وچ نئیں جاندا۔

واشنگٹن نے ایہناں ویلیاں وچ سیاسی، فوجی تے آگو ہون دے مینگے ول سکھے، برطانوی فوجاں دے لڑن دے ول اوہناں دے تکڑے تے ماڑے پاسے، ایہ چیزآں امریکی انقلاب وچ اوہدے لئی فیدا سن۔ اوہنے لوکاں نوں کٹھا کرنا، فوجی سکھلائی کرانی، پریڈ کرانی، لڑن دے ول تے فوج دی لوڑاں نوں پورا کرن دے ول اودوں ای سکھے۔

ماؤنٹ ورنن (1759–1774)

ماؤنٹ ورنن

6 جنوری 1759 نوں واشنگٹن نے اک امیر بیوہ مارتھا واشنگٹن نال ویاہ کرلیا۔ اوہ اوس ویلے 28 ورے دی سی تے اوہدے دو نیانے پہلے میاں توں سن۔ ویاہ مگروں اوہ ماؤنٹ ورنن اجاندے نیں تے زمینداری تے سیاست کردے نیں۔ ایس ویاہ نال اوہ ورجینیا دے امیر لوکاں وچ گنیا گیا۔ جارج نے اپنی ٹبری دے پہلے دو نیانیاں دا چنگے ول نال خیال رکھیا تے اگے اوہناں دے نیانیاں نوں وی پالیا۔ واشنگٹن تے مارتھا دے اپنے نیانے ناں ہوۓ۔ لڑائی وچ لڑن باجوں اوہنوں ورجینیا سرکار ولوں 23,200 ایکڑ انعام لبے۔ اوہ آپ وی زمین مل لیندا ریا تے ماؤنٹ ورنن نوں اوہنا ‎ 6,500 ایکڑ تے پھیلا دتا تے اوہدے کول 100 غلام وی سن۔ اوہدی امیری تے فوجی ہیرو ہون باجوں اوہنوں ورجینیا دی صوبائی اسمبلی دا سنگی 1758 وچ چن لیا جاندا اے۔

دوجے امیر زمینداراں وانگوں واشنگٹن لومڑی دا شکار کردا، تھیٹر، دوڑاں، ناچ پارٹیاں تے ککڑاں دیاں لڑائیاں وچ جاندا۔ تاش، بلیرڈ کھیڈنا وی اوہنوں آندا سی۔ اوہ اپنی تماکھو دی فصل باہر ویچدا تے یورپ توں عام زندگی وچ ورتیاں جان والیاں ودیا چیزاں منگاندا۔ واشنگٹن تماکھو نال کنک بیجن،کؤڑے پالن، کپڑا بنن تے وہسکی بنان دے کم وچ وی پیا۔ اوہدے ڈیرے تے لوکاں دا آنجان سی تے اتلی یا برابر دی پدھر دے لوک ای اوہ بلاندا سی۔ سیاست وچ اوہ اگے وددا اے جدوں اوہ ورجینیا دی قنون بنان والی اسمبلی وچ برطانیہ توں مال منگان دی روک دی مانگ کردا اے۔

امریکی انقلاب (1783–1775)

امریکی انقلاب وچ

واشنگٹن برطانیہ لوں امریکی صوبیاں تے لگن والے ٹیکس سٹیمپ ایکٹ 1765 دے خلاف سی تے برطانیہ دیاں پالیسیاں دے خلاف اوہنے برطانوی مال دے بائکاٹ دی مانگ کیتی۔ اگست 1774 دے ورجینیا کنونشن وچ اوہنوں پہلی کانٹینینٹل کانگرس وچ ورجینیا ولوں پیجیا جاندا اے۔ بوسٹن دے نیڑے اپریل 1775 وچ لیکسنگٹن تے کنکورڈ دیاں لڑائیاں مگروں امریکی کلونیاں برطانیہ نال لڑ پیندیاں نیں۔ واشنگٹن دوجی کانٹینینٹل کانگرس وچ فوجی وردی وچ جاندا اے بیہ دسن لئی جے اوہ لڑن لئی تیار اے۔ اوہدی مانتا، اوہدی فوجی لڑائیاں وچ پیا رینا تے ورجینیاجیہڑی سب توں وڈی کلونی سی توں ہونا, ایہ گلاں 14 جون 1775 نوں بنن والی کانٹینینٹل فوج دا اوہنوں کمانڈر بنادیندیاں نیں۔ میساچوسٹس دے جان ایڈمز نے اوہدا ناں اگے کیتا سی۔

جارج واشنگٹن دی فوج بوسٹن نوں کیرے وج لیلیندی اے۔ دس مہینے 3 ہفتے تے 6 دن مگروں 17 مارچ 1776 مگروں بوسٹن نوں برطانوی فوج چھڈ دیندی اے۔ امریکیاں دی ایہ جت اوہناں دا جوصلہ ودھاندی اے پر جدوں برطانوی فوج نیویارک تے اگست 1776 نوں ہلہ بولدی ا ےت ایہ شہر ویریاں کول جلا جاندا اے۔ واشنگٹن نے ایس ہار توں دل جھوٹا ناں کیتا تے برطانوی فوج نوں نیویارک توں اگے ودھن توں روک دتا۔

1777 نوں برطانوی فوجاں جرنل برگوئن دی آگوی وچ ولوں کیوبک، کینیڈا ہلہ بولدیاں نیں۔ نیوانگلینڈ ولوں برطانوی جرنل ہاؤ اتر ول جاندا اے۔ واشنگٹن نوں پچھے کرن مگروں ہاؤ دی فوج امریکی راجگڑھ فلاڈیلفیا تے مل مار لیندی اے۔ پر امریکی فوج کینیڈا ولوں آن والی فوچ نوں ساراٹوگا دی تھاں تے روک کے ہتھیار رکھوالیندی اے۔ ایس جت نال فرانس امریکہ دا سنگی بن جاندا اے۔ فلاڈیلفیا دے امریکیاں دے ہتھوں نکلن باجوں کئی لوک واشنگٹن نوں آگوی توں لآ دینا چاہندے نے پر واشنگٹن دے سنگی اوہدے نال کھلو جاندے نیں۔ دسمبر 1777 وچ واشنگٹن 11000 فوجیاں نال فلاڈیلفیا اپڑدا اے تے 1778 وچ برطانوی فوجاں نوں فلاڈیلفیا چھڈنا پیا۔ واشنگٹن ایس فوج دے پچھے نیویارک تک گیا۔ 1779 وچ امریکی فوجاں برطانیہ نال رلے 40 انڈین پنڈاں نوں ساڑدیندی اے۔ 1780 وچ 5000 فرانسیسی فوجی امریکہ دی ہتھ ونڈائی نوں آگے۔ فرانسیسی سمندری فوج برطانوی فوج نوں اک لڑائی وچ ہراندی اے تے فیر واشنگٹن برطانوی فوجاں تے اک وڈا ہلہ بولدا اے۔ 17 اکتوبر 1781 نوں یارکٹاؤن، ورجینیا تے برطانوی فوج ہتھیار سٹ دیندی اے تے ایس نال اتلے امریکہ وچ لڑائی وی مک جاندی اے۔

برطانوی فوج یارک ٹاؤن دی لڑائی ہارن تے وی تکڑی سی۔ اوہدے کول نیویارک ساوانہ تے چارلسٹن دے شہر تے اک تکڑی سمندری فوج سی۔ 1782–83 دے ورے امریکیاں نے اپنے ڈنڈیاں دے زور تے لنگہاۓ۔ خزانہ خالی سی تے فوجیاں نوں تنخواہ ناں ملن تے کھیچل لگی سی۔ 3 ستمبر 1783 نوں پیرس دی ٹریٹی نال برطانیا امریکہ نوں ازاد من لیندا اے تے 2 نومبر نوں واشنگٹن اک تقریر کرن مگروں کانٹیننٹل فوج نوں مکا کے گھر پیج دیندا اے۔ 25 نومبر نوں برطانوی فوج نیویارک توں جاندی اے تے واشنگٹن تے گورنر شہر وج آندے نیں۔ 23 دسمبر 1783 نوں اوہ فوج چھڈ دیندا اے۔ تاریخ لکھاری گورڈن وڈ ایہ گل لکھدا اے جے امریکی فوج دی آگوی نوں چھڈنا ( جدوں کہ اوہ دنیا دی اک وڈی طاقت نوں ہرا چکیا سی تے اپنے دیس وچ وی اوہنوں کوئی روکن والا نئیں سی ) اوہدا سب توں وڈا کم سی۔ ایہ اک ایسا کم سی جینے یورپ دی اتلی پدھر دے لوکاں نوں وی حیران کردتا۔ انگریز بادشاہ جارج نے وی اوہدے ایس کم نوں سلاہیا۔

واشنگٹن لڑائی توں واپس ماؤنٹ ورنن کج چر ای ریا۔ 1787 وچ اوہنوں کانسٹیٹیوشنل کنونشن فلاڈیلفیا وج ودر بنایا جاندا اے۔

امریکی صدر (1789–1797)

امریکی صدر

1789 وچ امریکہ دے صدر نوں چنن والی ٹولی اوہنوں 100٪ ووٹاں نال امریکہ دا صدر چن لیندی اے تے فیر دوبارہ 1792 وچ اوہنوں صدر چن لیا جاندا اے۔ جان ایڈمز نوں نکا صدر چنیا جاندا اے۔ اوہ 30 اپریل 1789 نوں نیویارک دے فیڈرل ہال وچ اپنے صدر ہون دی سوں کھاندا اے۔ امریکی کانگرس اوہدے لئی 25،000 $ تنخواہ مندی اے جیہنوں واشنگٹن نئیں لینا چاہندا اوہ امیر سی تے بنا کسے لالچ دے اپنی قوم دی سیوا کرنا چاہندا سی۔ کانگرس دے زور لان تے اوہنوں تنخاہ لینی پئی جے کتے ایہ ناں ہوے جے مگروں بنن والے صرف امیر ای ہوں جیہڑے اپنے آپ نوں پال سکدے ہون تے کوئی غریب صدر ناں بن سکے۔ واشنگٹن نوں پتہ سی جے اوہ اپنے آن والیاۂ لئی ادھارناں بنا ریا اے تے ایس کرکے اوہ بڑا سمبہل کے ٹردا سی تے کوئی ایسا کم ناں کیتا جے اوہدے تے کوئی انگلی چک سکے۔ اوہنے یورپ دے شاہی ٹبراں دی بالکل نقل ناں ماری تے اپنے لئی مسٹر پریزیڈنٹ دا نویکلا ناں چنیا۔ واشنگٹن نے اپنے کم نوں زمیواری، شوق تے اکھاں کھول کے نبھایا۔ واشنگٹن نے بڑی ٹل مٹھ کرکے دوجی واری صدر بنیا تے تیجی واری لئی بالکل ناں منیاتے اینج ایہ زیادو توں زیادھ دو واری راج کرن دی اک ریت بنادتی۔

واشنگٹن دے وزیراں وچوں الیگزنڈر ہملٹن تے تھامس جیفرسن دی آپس وچ ناں بنی۔ دونویں وکھریاں سوچاں والے سن تے جیفرسن نوں وزارت چذڈنی پئی۔ 1790 دے اک قنون باجوں صدر نوں ایہ اختیار دتا گیا جے اوہ امریکہ دے اک پکے راجگڑھ لئی کوئی تھاں چنے۔ اک تن بندیاں دی ٹولی وی ودر دی ہتھ ونڈائی لئی دتی گئی تے ایہنے پوٹومک دریا دے کنڈے تے اوہ تھاں چنی۔ جارچ واشنگٹن امریکہ دے پہلے صدر دے ناں تے امریکہ دا راجگڑھ واشنگٹن رکھیا گیا۔ 1791 وچ کانگرس نے وہسکی تے ٹیکس لایا۔ کئی صوبیاں وچ ایہنوں ناں منیا گیا۔ ایس گل تے واشنگٹن نے کئی صوبیاں توں فوجی کٹھے کرکے ناں منن والیاں تے چڑھائی کردتی تے اوہ نس پج گۓ۔ واشنگٹن دے ایس تکڑے کم نے ایہ گل دسی جے سرکار اپنا بچا کرسکدی اے تے امریکی سرکار اپنی طاقت نال لوکاں تے صوبیاں تے اپنا زور منواسکدی اے۔

1793 وچ برطانیہ تے ایدے سنگی دیساں تے انقلابی فرانس دے وشکار لڑائ ہوگئی جیہڑی 1814 تک رئی۔ فرانس نے امریکہ دا ایدھی ازادی وچ ساتھ دتا سی تے فرانس دا خیال سی جے ہن امریکہ اوہدے نال برطانیہ نال لڑیگا۔ واشنگٹن نے نیوٹرل رہن دی پالیسی تے چلیا۔ جیدے باجوں فرانس نال ساک گوڑے ناں رۓ۔ ہیملٹن تے واشنگٹن برطانیہ نال بپاری ساک ٹھیک کردے نیں جیدا فیدا امریکہ نوں ہوندا اے پر برطانیہ نال بپاری ساک ٹھیک ہون نال فرانس نوں کھندک ہوندی اے۔

19 ستمبر 1796 نوں اوہنے اپنی دوسری واری دے مکن دے نیڑے لگن تے امریکی قوم نے اک چٹھی نال جیہڑی اک اخبار وچ چھپی اپنی سوچ دا نتارا دسیا۔ اوہنے امریکیاں نوں یورپی لڑائیاں توں بچن، امریکہ دے ماملیاں وچ دوجے دیساں نوں پنگے بازی توں روکن تے دنیا دے کسے دیس نال پکی یاری بنان توں روکن دا کیا۔ کسی وی دیس نال بپار تے یاری امریکی فیدے لئی ہونی چاہیدی اے۔

4 مارچ 1797 نوں اوہ صدارت دا ویلہ پورا کرن مگروں اپنے کر ماؤنٹ ورنن واپس آگیا۔ اوہ زمینداری تے دوجے کمکجاں وچ رجھ گیا۔ 1798 وچ جدون فرانس نال ساک لڑائی تک اپڑ گۓ تے امریکی صدر دے کہنے تے اوہ امریکی فوجاں دا کمانڈر 13 جولائی 1798 توں 14 دسمبر 1799 تک ریا۔

موت

واشنگٹن مونومنٹ

12 دسمبر 1799 نوں واشنگٹن کؤڈے تے بیٹھ کے مین تے ڈگدی برف وچ اپنیاں زمیناں ویکھن گیا جس تے اوہنوں ٹھنڈ تے ہور روک لگ گیا جس پاروں 14 دسمبر 1799 نوں 67 ورے دی عمر وچ اوہ مرگیا۔ 18 دسمبر 1799 وچ اوہنوں ماؤنٹ ورنن وچ دب دتا گیا۔ امریکہ تے ساری دنیا وچ اوہدے مرن تے افسوس کیتا گیا تے نپولین نے فرانس وچ دس دن دے سوگ دا ہوکا دتا۔

یاد

امریکی قوم واشنگٹن نوں اک وڈا ہیرو مندی اے جیہنے پہلے امریکی فوجاں دی آگوی کردیاں ہویاں برطانیہ نوں نسایا فیر امریکہ دا صدر بن کے تے آپ دو واری صدر بنن مگروں صدر دے عہدے نوں چھڈیا تے اپنی قوم لئی اتلی پدھر دیاں ادھارناں بنایاں۔

امریکی قوم نے واشنگٹن نوں وڈی مانتا دتی اے۔ واشنگٹن دا جمن دیہاڑہ امریکہ وچ چھٹی دا دن اے۔ اک ڈالر دے نوٹ تے کواٹر ڈالر تے اوہدی مورت اے۔ ماؤنٹ رشمور دی قومی یادگار وچ لنکن جیفرسن تے روزویلٹ نال اوہدی بتی وی بنائی گئی اے۔ واشنگٹن ڈی سی دے نیشنل مال تے اوہدی اک یادگار واشنگٹن مونومنٹ دے ناں نال بنائی گئی اے۔ امریکہ دا راجگڑھ واشنگٹن ڈی سی، امریکہ دا اک صوبہ واشنگٹن، جارج واشنگٹن یونیورسٹی تے واشنگٹن یونیورسٹی اوہدے ناں اتے نیں۔

بارلے جوڑ

امریکی صدر

واشنگٹن · ایڈمز · جیفرسن  · میڈیسن · مونرو · ایڈمز · جیکسن · بورن · ہیریسن · ٹائلر · پولک · ٹیلر · فلمور · پیئرس · بکانن · لنکن · جانسن · گرانٹ · ہیز · گارفیلڈ · آرتھر · کلیولینڈ · ہیریسن · کلیولینڈ · میک کنلے · روزویلٹ · ٹافٹ · ولسن · ہارڈنگ · کولج · ہوور · ڈی روزویلٹ · ٹرومین · آئزن ہاور · کینیڈی · جانسن · نکسن · فورڈ · کارٹر · ریگن · بش · کلنٹن · بش · اوبامہ