Sexologia ta e estudio cientifico di sexualidad, e ta un ciencia multi-disciplinario, e enfoke ta riba aspectonan di biologia, psicologia, y social-cultural di sexualidad. Ademas, e ta trata cu e desaroyo educativo y di terapia. Sexologia ta trata tanto di sexualidad normal como abnormal.
E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.
E concepto di sexologia a precede sexologia moderno durante antiguedad Griego y Romano. E filosofonan, manera Platon, Aristoteles, y docternan, manera Hipocrates (460 a.C.–370 a.C.), Sorano de Efeso (98–138 d.C.) y Galeno (129–216 d.C.) tabata cuestiona, por ehempel, educacion sexual, ley sexual, etica sexual, reaccion sexual y deterioracion, reproduccion y anticoncepcion. Manualnan di sex tambe a existi for di tempo antiguo, por ehempel, Ars Amatoria[nl] (Latin pa 'Arte di Amor'), Kama Sutra[nl] ('Siñansa di Amor'), y The Perfumed Garden[nl] ('E Hardin Perfuma').[1]
Un estudio den añanan 1830 bou di 3.558 prostituta na Paris, De la prostitution dans la ville de Paris ('Prostitucion na e ciudad di Paris'), ta wordo considera como e prome obra di investigacion sexual moderno.[2] Na Inglatera, James Graham, tabata un sexologo cu tabata duna charla ariba topiconan manera e proceso di sex y concepcion.[3]
Havelock Ellis (1859–1939), un figura pionero den e movemento pa emancipacion sexual na fin di siglo 19.
E estudio cientifico di e comportacion sexual di e ser humano a cuminsa den siglo 19 cu Heinrich Kaan, kende su buki, Psychopathia Sexualis ('Psicopatia Sexual', 1844) a wordo describi pa Michel Foucault como e fecha cu a marca e "emergencia di sexualidad y sexualidad abnormal den e campo di psikiatria".[4] E terminologia sexologia a wordo inventa pa prome biaha na Merca pa Elizabeth Osgood Goodrich Willard na 1867.[5]
Rond 1900 sexologia a desaroya. Aña 1906 ta considera como e nacemento di sexologia; for di aña ey e desaroyo di sexualidad como ciencia a tuma lugar. Na 1907 Iwan Bloch (1872–1922), un doctor Aleman, a skirbi un buki pionero riba e topico aki cu e titulo Das Sexualleben unserer Zeit ("E Bida Sexual di Nos Tempo"). Den e buki, Bloch a propaganda cu e fenomeno di sexualidad no mester ta solamente tema di investigacion cientifico medico, sino cu e estudio di sexualidad, tambe ta multidisciplinario y interactivo cu otro ramanan di ciencia, por ehempel, biologia y antropologia. Revistanan di sexologia a aparece y a funda asociacionnan di sexologia.
Alrededor di añanan '60 y '70 a tuma lugar e revolucion sexual cu a trece cambionan grandi den e manera di experencia, practica, y evalua moral di sexualidad. Sexologia a wordo introduci pocopoco den enseñansa. Na fin di añanan '80 a sali e prome buki tocante sexologia pa mediconan den entrenamento, un decada despues e ta yega tambe na un publico mas amplio.
Den cuido medico tabatin cambionan durante transcurso di añanan: inicialmente a domina e psikiatra cu tabata orienta riba psicoanalisis, despues esaki a hala pa e psicologo clinico, principalmente, esunnan enfoca riba terapia di comportacion.
Vern L. Bullough(1989)."Society for the Scientific Study of Sex".The Society for the Scientific Study of Sex: A Brief History.Foundation for the Scientific Study of Sexuality.ISBN9780962437304.