Operacion Market Garden

L'Operacion Market Garden foguèt una ofensiva aliada que se debanèt dins lo corrent de la Segonda Guèrra Mondiala dau 17 au 25 de setembre de 1944. Son objectiu èra de capturar plusors pònts sus lo territòri neerlandés per permetre ais Aliats de conquistar la region industriala de Ruhr, centre de l'economia alemanda. Necessitant mai d'un largatge de paracasudistas britanics, estatsunidencs e polonés e una coordenacion precisa amb una ofensiva terrèstra d'un còrs blindat britanic, l'operacion mau capitèt en causa de la resisténcia alemanda dins lo sector d'Arnhem que son pònt poguèt pas èsser conquistat per leis Aliats.

Fotografia de presoniers britanics capturats a l'eissida dei combats d'Arnhem.

En causa d'aquela resisténcia, leis Aliats decidèron de se retirar après aver recuperat un maximom de paracasudistas britanics. Deguèron abandonar la màger part de sei conquistas dempuei lo 17 de setembre. Market Garden es ansin considerada coma la darriera victòria importanta dau III^en Reich sus lo frònt oèst. D'efiech, leis Aliats i perdiguèron 18 000 òmes (còntra 3 300 a 8 000 per leis Alemands) e lei formacions aeroportadas britanicas i foguèron decimadas. Autra consequéncia grèva per leis Aliats, la mobilizacion necessària a l'ataca permetèt ais Alemands de se reorganizar dins leis illas situadas a l'entorn dau pòrt d'Anvèrs e de'n blocar l'accès fins a novembre de 1944.

Liames intèrnes

• Frònt de l'Oèst (Segonda Guèrra Mondiala).

Bibliografia

• (en) Cornelius Ryan, A Bridge Too Far, Londres, Coronet Books, 1978.