From Wikipedia, the free encyclopedia
La Nebulosa dau Cranc (M1, NGC 1952) es un rèsta de supernòva situat dins la constellacion dau Taure ai coordenadas 05h 34m 31,97s1 e +22° 00′ 52,1″1.
Rèsta de la supernòva de 1054, que son explosion foguèt visibla de julhet de 1054 a abriu de 1056, foguèt descubèrta en 1731 per l'astronòm anglés John Bevis (1695-1771). Puei, Charles Messier (1730-1817) la classèt en premiera posicion au sen de son catalòg d'objèctes celèsts. D'una magnitud aparenta de 8,3 e d'una talha angulara de 420″ × 290″, es aisament visibla amb un instrument amator.
Se situa a aperaquí 6 200 annadas lutz de la Tèrra. Es un nívol filamentós de gas, d'una massa estimada a cinc massas solaras e d'un diamètre de dètz annadas lutz, qu'es en expansion a la velocitat de 1 500 km/h. Son centre es ocupat per un pulsar qu'es la fònt d'un camp magnetic fòrça poderós e d'un nombre important de raionaments electromagnetics.