Gueorgui Júkov

Gueorgui Konstantinovich Júkov (en rus: Георгий Константинович Жуков; 1^èr de decembre de 1896 - 18 de junh de 1974) èra un militar sovietic, Manescau de l'Union Sovietica, qu'aguèt un ròtle major dins la victòria deis Aliats còntra l'Alemanha Nazia. En particular, dirigiguèt leis operacions de l'Armada Roja pendent lei batalhas victoriosas de Khalkhin Gol, de Leningrad, de Moscòu, de Stalingrad, de Kursk, de l'Operacion Bagration e de Berlin. Es l'oficièr pus decorat de l'istòria militara sovietica.

Fotografia de Gueorgui Júkov en setembre de 1941 au començament de la Segonda Guèrra Mondiala.

Après la guèrra, conoguèt un periòde de desgràcia fins a la mòrt de Stalin. Puei, en 1955, venguèt ministre de la Defensa e participèt a la mesa en plaça de la politica de Destenduda entre lei dos blòts. En junh de 1957, ajudèt d'un biais decisiu Nikita Khrushchov dins la lucha de poder còntra leis autrei caps sovietics. Pasmens, sa poissança au sen de l'institucion militara esfraiava tant seis aliats que seis adversaris. Ansin, quand agantèt lo temps de la retirada en octòbre de 1957, foguèt obligat de se retirar sota la pression deis autoritats. Pasmens, demorèt una personalitat importanta de l'Union Sovietica fins a sa mòrt en 1974.

Après lo conflicte e sa mòrt, unei monuments foguèron bastits en son onor. Pasmens, la màger part foguèt destrucha dins leis ans 1990 après l'afondrament de l'Union Sovietica. De mai, en 1974, un vilatge de sa region natala foguèt dich en son onor e, en 1975, foguèt lo torn d'un asteroïde. En 1996, Russia creèt una decoracion militara dicha Òrdre de Júkov qu'es principalament destinada a guierdonar leis accions de comandament de remarca.

Liames intèrnes

• Batalha de Moscòu.
• Batalha de Stalingrad.
• Batalha de Kursk.
• Operacion Bagration.
• Batalha de Berlin.

Bibliografia

Nòtas e referéncias