Emil Zátopek

Emil Zátopek (Kopřivnice, 19 de setembre de 1922 – Praga, 22 de novembre de 2000) es un atleta chèc que foguèt especialista en corsa de fons. Zátopek, qu'aviá per escais la locomotiva umana ganhèt 4 títols olimpics e teniá 18 recòrds del mond. Foguèt considerat eròi nacional en Checoslovaquia.

Biografia

Emil Zátopek (a man esquèrra) amb Reinaldo Gorno a Helsinki en 1952

Emil Zátopek nasquèt en 1922 a Kopřivnice, una vilòta de la region de Moràvia-Silesia, dins una familha modèsta que n'èra lo sieisen enfant. Aguèt de trabalhar tre l'edat de 16 ans dins las fabricas de sabatas Bata à Zlín. Es gràcias a aquel emplec que comencèt a far d'atletisme, qu'en 1940 la societat decidiguè de lo far participar a una corsa qu'esponsorizava. Acabèt segons mas aquel eveniment marquèt la debuta de sa carrièra esportiva. A partir d'aquel moment quitèt pas s'entrainar en prendre coma modèl lo correire finlandés Paavo Nurmi.

Dintrèt dins l'armada checoslovaca en 1945 per i far son servici militar e i demorèt que trobava lai de condicions favorablas per son entrainament. Gràcias a l'armada coneguèt Dana Zátopková, la filha de son colonèl, que vendriá puèi son esposa.