From Wikipedia, the free encyclopedia
Amr ibn al-As († 664, Egipte) es un generau arabi dau sègle VII que foguèt companhon de Maomet. Noble de la tribü Qurays, s'opausèt inicialament a l'islam avans de se convertir vèrs 629-630. Après una mission diplomatica en Oman que mau capitèt, Maomet li fisèt la direccion d'expedicions militaras. Amr ibn al-As gardèt aqueu ròtle après la mòrt dau Profèta. Participèt ansin a la conquista de Siria, de Palestina, de Cilícia, d'Iraq e d'Egipte. Aguèt un ròtle major dins la presa d'aquela darriera region e ne'n foguèt nomat governador en 640. Adoptèt una politica moderada en gardant l'òrdre sociau e religiós en plaça en cambi dau pagament d'impòsts. Puei, organizèt la conquista de Libia. En 646, perdiguèt lo contraròtle d'Egipte e se raprochèt dei faccions conservatritz. Ansin, durant la Premiera Fitna, se ralièt a Muawiya. Aquò li permetèt de tornar venir governador d'Egipte. Moriguèt dins aqueu país e foguèt enterrat a Fustat.