Tèrra del Fuòc

La Tèrra del Fuòc (var. Tèrra deu Huec; Tèrra dau Fuòc/Fuec), (en espanhòl Tierra del Fuego), es un archipèla de 73 753 km² situat a l'extremitat sud del continent american e que n'es desseparat per l'estrech de Magellan. Lo punt mai sud de l'archipèla es lo cap Hòrn.

Mapa de la Tierra del Fuego.

Geografia

La vila d'Ushuaia

L'archipèla es format per una illa principala (Illa Granda de Tèrra del Fuòc), amb una superfícia de 48 100 km², e un grop de pichòtas illas. L'illa màger es desseparada entre dos païses: 18 507,3 km² (38,57% del total) apertenon a Argentina, e 29 484,7 km² (61,43% del total) apertenon a Chile. La mitat d'aquela illa, e de las illas situadas a l'oèst e al sud d'aquesta, fan partida de la Region de Magallanes e de l'Antartica Chilena, que la capitala e capluòc n'es Punta Arenas. Las vilas chilianas pus grandas son Porvenir, capitala de la Província Chilena de Tèrra del Fuòc, sus l'illa màger, e Puerto Williams, sus l'Illa Navarino, qu'es la capitala de la Província Antartica Chilena. Puerto Toro se troba qualques quilomètres al sud de Puerto Williams e es lo vilatge pus al sud del monde.

Lo parçan èst de l'archipèla aperten a Argentina, e fa partida de la Província de Tèrra del Fuòc, Antartida e Illas de l'Atlantic Sud; sa capitala n'es Ushuaia, la pus granda vila de l'archipèla. L'autra vila importanta dins la region es Río Grande (Tèrra del Fuòc) situada per la còsta atlantica.